Shillong, Risaw 18: U Phadar Jimmy Marngar Pro Chancellor jong ka Archdiocese Shillong, u la pyntip mynta ka sngi ba ia ka met jong u Archbishop Rev Domminic Jala yn buh shimiet ha iing kmie jong u ha Mawlai Phudmawri kata ha ka miet 20 tarik mynta u bnai.
Ha ka step 21 tarik mynta u bnai ha ka por 6 baje mynstep kin rah sha Nazareth Hospital Shillong ban pyndep ia kaba don kam bad la kumno kumno ha ka por 10.00 baje mynstep la lah ban pynpoi hapoh iing mane bah ha Laitumkhrah.
Ki paidbah ki lah ban wan jngoh khatduh ia u Arbishop ha iing mane bah naduh ka 21 tarik haduh ka 23 tarik mynta u bnai haduh ka por shibaje noh phai sngi shuwa ba kan sdang ka jinglehniam.
La iathuh ba mynta ka sngi kala don ka jingiakren bad pulit jong ka nongbah Shillong ban ia pynbeit ia ki kali kumno ban ieng ha ka sngi tep ia u Archbishop. La iathuh ruh ba la ioh ia ka jingbit ba ha ka 23 tarik baroh ki skul jong ka balang Katholik kiba don hapoh jong ka Shillong Archdiocese kin khang.
La aithuh ruh ba ha dien bala ioh ia ka tarik kaba thikna ba kan poi ka met jong u Archbishop ha Shillong la phah ia ka jingtip sha ki Bishop bapher bapher kiba don ha kylleng jong ka Ri India, u nonglehniam rangbah ha katei ka sngi, lada u wan u Archbishop jong ka Goa u Rev Philip Neri President jong ka Conference jong ki Catholic Bishops jong ka Ri India, un ialam ia ka jinglehniam lada ym poi, ia ka jinglehniam yn ialam da u Archbisop Rev John Moolachira u Archbishop jong ka Guwahati u bah dei u president jong ki Regional Bishop Council.
