Shillong, Naiwieng 01: Ban iada na ka jingrung ki briew ha ka jylla rai ka Kabinet ban pynkylla noh ia ka ain Meghalaya Residence Safety and Security Act 2016, bad ia kane yn pynmih noh ia ka jingpynbna sorkar kum ka “Ordinance” ba kan trei kam noh mardor.
Haba kren ha ki lad pathai khubor ha dien ka jingialang na ka liang jong u symbut myntri rangbah ka jylla u Bah Prestone Tynsong u la iathuh ba ia kane ka rai jong ka kabinet kaba la shim mynta ka sngi ym pyntrei kam noh ha ka ordinance bad ynda la shong dorbar ym sa pdiang ia ka hapoh ka iing dorbar.
Na ka liang jong ka sorkar shen kan sa pynkylla ruh ia ki rule jong ka snem 2017 ha kaba ia dei bad ka MRSS Act na ka bynta ban pyntrei kam ia kane ka Ordinance. Da kane ka rai jong ka kabinet, baroh ki briew ki bymdei ki trai shnong jong ka jylla Meghalaya ki hap ban register ia la de haba ki wan sha ka jylla.
U sumbut myntri rangbah u la batai shai kdar “ Nga kwah ban pynshai ba kane ka ain kan nym ktah ia ki Non Tribal kiba dei ki nongshong shnong ba pura jong ka jylla Meghalaya”. La ong ruh ba kane ain kan nym trei kam ia kito ki nongtrei sorkar kiba dei jong ka sorkar pdeng ne ki jong ka sorkar jylla ne kiba trei ha ki ophis ba la ithuh da ka sorkar.
Haba ia dei bad ki briew kiba wan sha kane ka jylla ki hap ban register la ki dei ki nongtrei bylla, ki ba wan khaii pateng, kiba shuwan kai sngewbha baroh ki hap ban pynshai ha ka por kaba ki wan ban rung bad kan don ka kyndon ban pynshitom ia ki lada ki pynkhein ia ki kyndon da kaba khlem register lane ki ai jingtip da kaba shuthok.
Haba ia dei bad ki sngi ia kane yn sa pynbeit ha ka rule ynda la pynkylla ia ka rule, hynrei ka jingpynshsitom kan hap hapoh ka ain Indian Penal Code 1860 hapoh ka kyndon 176. La ong bay m don kam ia ka ILP hynrei kane ka ain jong ka jylla kala biang ia mynta.
La ong ba ki briew kiba kwah ban wan sha Meghalaya ki la hap ban register online bad kiban peit ia kane kin dei ki District Task Force Committee kaba ym pet da ki Deputy Commissioner bad ki Superintendent ki pulit, haba ia dei bad ka jingduna jong ki nongtrei na ka liang jong ka sorkar kan sa thung briew shuh.
