Shillong, Naiwieng 28: Ha ka jingshisha ngam kwah shuh ban pynmih kano kano ka jingthoh kiba ia dei bad ki kam sain pyrthei, hynrei kum u briew uba la bat ar sien ia ka kam CEM ha KHADC ngam lah khlem da pynmih ia kane ka jingthoh haba nga pule ia ka jingkren jong u Deputy Chief Minister ka Jylla Meghalaya kaba la shon ha u Nongsain Hima mynta ka sngi (28 tarik November, 2019) – “HAP ITHUH DA KA SOR-KAR IA U CEM KA KHADC LYNGBA KA JINGPYNBNA : DY CM”.
Ha kaba u Dy. CM badonburom u ong ba donkam ban da ithuh da ka sorkar Jylla lyngba ka DCA; bad ba ka Cabinet kan shong ban ia kren halor kane ka jingbymshai jong ka jingjied ia u CEM ka KHADC. Ngin phai sha ka Assam and Meghalaya Autonomous Districts (Constitution of District Councils) Rules, 1951, as amended ba la shu khot lyngkot “AD Rules” ban peit kumno ka kren halor ka jingjied ia u CEM, Quote “Rule 20 (1) : The Chief Executive Member shall be elected by the District Council and the other Executive Members shall be appointed by the Governor on the advice of the Chief Executive Member from amongst the members of the District Council.”
Bad kane ka post u CEM kam bit ban long thylli (vacant),na kata ka daw haba pynkhyllem (removal) ia ka Executive Committee, ka Council ka hap ban pyndep ia ka jingjied (elction) khlem da pynslem, bad ba ia kata ka kam jied CEM thymmai ka Council ka dei ban pyndep hapoh 48 kynta “Rule 22 (2):In case of removal of the Executive Committee, a Chief Executive Member for the new Executive Committee SHALL be elected within 48 hours by the District Council and when this has been done the Chairman of the District Council SHALL forth-with submit A REPORT to the Governor through the Deputy Commissioner.”
Ka shai kdar hangne ba ym dei ban da ioh approval hynrei tang ban pyntip ia u Governor bad la da thoh “a report” – “the Chairman shall forthwith submit a report to the Governor thourgh the Deputy Commissioner” – ka shai kdar bym donkam ban da ioh approval, bad bym donkam ei ei na ka Sorkar Jylla namar ki Autonomous District Council kim dei ki Department jong ka Sorkar Jylla hynrei ba ki dei ki Autonomous Bodies ki bym don ei ei kaba tap ia ki na jrong.
Kumta, u Deputy Chief Minister badon burom u khlem da ioh ban peit pule bha ia kine ki Rules, te ka long kaba mynsaw ba un rah ia kane ka kam sha ka Cabinet halor kata ka nongrim, namar lada ka Cabinet ruh ka shim ia ka rai da kaba shu shaniah ia katei ka statement jong u Hon’ble Dy. CM kan long ka jingpynjah burom ka bakhraw ia ka jingbym tip ain jong ka Sorkar Jylla. Ka kyrkieh haduh katta ba dei ban jied ia u CEM, kat haduh ba ka Rule 22 (3) ka buh kyndon ba lada ym lah ban jied hapoh 48 kynta ia u CEM bathymmai u Governor un thung hi ia uno uno u MDC ban long u CEM bad ia saw ngut ki MDC ban long ki Executive Members.
Haba ka kyrkieh kumta ka mut ba u CEM tang hadien ba la dep jied ha ka Council, u la lah ban leit sha ka kamra treikam jong u CEM bad sdang noh ia ka jingtrei kam, kaba ma ngi baroh ki CEM kynthup lang ruh ia u Dy.CM uba mynta uba la shah jied CEM ha ka snem 2004 ngi leh kumta; bad ka kam kaba nyngkong eh hi ka dei ka jingphah ia ka list ki MDC ba dei ban ioh ia ka jingthung (appointment) na u Governor ban long ki Executive Members katkum ka Rule 20 (1) ba la sot haneng.
Ha baroh ar sien ki jinglong CEM jong nga, nga la leh kumta, kata, na Council Hall sha kamra bad sdang treikam, ngam ju ap ia kata ka approval namar kam don ka Rule kaba dawa ba dei ban leh kumta; ka long bieit ba ngin ap ia ka approval haba ka jingphah sha u Governor ka dei tang ka Report. La ong u bah H.S Shylla, Ex-CEM.
