Shillong, Naiwieng 30: Ha ka jingleit ia kynduh ia u myntri kam poh iing jong ka sorkar pdeng u Amit Shah mynta ka sngi ban ia kren halor ka Citizenship Amendment Bill, 2019, na ka jylla Meghalaya kila phah tang kawei ka jingthoh ba ki pyrshah ia katei ka Bill.
Ha ka jingthoh kaba la ai sha u myntri kam poh iing ka sorkar pdeng ha kaba la ia soi da u myntri rangbah ka jylla u Conrad K Sangma na ka liang jong ka sorkar bad ki seng sain pyrthei, bad ki seng bhalang kila pynpaw ba ki pyrshah ia ka CAB.
Ha kane ka jingthoh la kdew ba ka sorkar pdeng ka don ka jingthmu ban wanrah ia ka jingpynkylla ia ka Citizenship Act 1955 ha ka dur jong ka Citizenship Amendment Bill, 2019.
Ha kane ka shithi kaba la ai ha kane ka jingialang mynta ka sngi la kren shai ba na ka liang jong ka sorkar, ki seng sain pyrthei bad baroh ki seng bhalang ki pyrshah ia ka CAB. Ha ka jingiakynduh jong ki kaba la long ha ka 29 bad 30 tarik kila shim ia ka rai ban pyrshah ia ka CAB ha Meghalaya.
Ha kane ka jingiakynduh ia u myntri kam poh iing jong ka sorkar pdeng u Amit Shah la ialam da u myntri rangbah ka jylla Meghalaya u Conard K Sangma, ha kaba la don lang ki president jong ki seng sain pyrthei bad ki nongialam seng bhalang kiba la ia soi lang ha katei ka shithi.
Baroh ki seng bhalang kiba la ia soi lang na kane ka jylla kiba la shah khot ki long 16 tylli ki seng, ka FKJGP, KSU,RBYF, JSU,GSU,GSMC,CORP,ADE,HNYF, HANM,CoMSO,MPLU.
