Shillong, Nohprah 08: Ka Meghalaya Peoples’ Human Rights Council (MPHRC) ka pdiang sngewbha ïa ka Rai jong ka Sorkar India lyngba ka tnat Ministry of Environment, Forest and Climate Change (MoEFCC), kaba la pynbna ba la pyndam noh ïa ka jingthmu ban pynkylla ïa ka “ Draft Indian Forest Act (IFA) 1927”. Ïa kane ka rai la dep pynbna da u Prakash Javadekar, U Myntri Sorkar Kmie uba dei peit ïa Environment, Forest and Climate Change (MoEFCC) dang shen.
“Ngi pdiang sngewbha ïa kane ka jingpynbna jong u Myntri Sorkar kmie uba la sngap bad burom ïa ka sur jong ki paidbah na kylleng ka ri khamtam eh na ki Paid Trai-Ri, Trai-Muluk, kiba dei kiwei na ki jaidbynriew ki ban shah ktah jur lyngba kane ka pynkylla ïa ka Indian Forest Act 1927” ong u Bah Dino D.G. Dympep, Chairman ka MPHRC.
“Kum ban shu pynkynmaw, ha ka 3 Tarik u Lber 2019 ka MoEFCC ka la pynbna bad tyrwa ban wanrah noh ka jingpynkylla ïa kane ka Aiñ IFA 1927 kaba la palat 90 snem bad halor kane la phah shithi sha ki Sorkar Jylla baroh ba kin ai jingmut hadien ka jingïaphylliew jingmut lang bad baroh kiba ïadon bynta ha ka khyndew ka shyïap, ki khlaw ki btap bad la aipor ruh ba kin phah ïa ki jingai jingmut hapoh 90 sngi kata kat haduh ka 7 tarik Jylliew 2019. Ka Sorkar Meghalaya ha ka 16 tarik Naitung 2019 ka la pynbna ba ka jingïamir jingmut halor ka jingwanrah ka jingpynkylla ïa ka IFA 1927 ka la ïaid shakhmat” ong ka MPHRC.
Ka MPHRC ka la pyrshah jur halor ka jingpynkhreh ka Sorkar Kmie ban pynkylla noh ïa ka Indian Forest Act (draft amendment to the Indian Forest Act,(IFA),1927) namar ka jingwan rah bad ka jingthmu ban pynkylla ïa kane ka Aiñ kaba ïadei bad ki khlaw ki btap kan wan rah ïa ka jingma kaba khraw ym tang ïa ki riewlum lane ïa ki briew kiba pynlong jaka sah ha ki jaka khlaw naduh hyndai hynthai hynrei na ka bynta ka roi ka par jong ka ri bad kane kan ktah jur ruh ym tang ïa ka mariang hynrei kan long pynban kum ka jingïuhroit ïa ka Hok Longbriew Manbriew ki paid Trai-Ri, Trai-Muluk ha kylleng jong ka Ri. Ïa kane ka jingpyrshah la dep pynsngew lyngba ka jingthoh kaba ka Council ka la phah sha ka Sorkar India ha u bnai Nailar 2019.
“Ïa mynta ki don kumba 11 tylli ki Jylla kiba la don la ki jong ki Aiñ ïada ïa Khlaw (Forest Act) bad ngi kyrmen ba ka Jylla Meghalaya ruh ka dei ban don noh la ka jong ka Aiñ kiaba ïahap dur lang bad ki kyndon kiba don ha ka Khyrnit ba hynriew (Sixth Schedule) khnang ba kan nym don ka jingthyngkhuh bad ki kyndon treikam jong ki 3 (lai) tylli ki Autonomous District Council kiba don ha ka Jylla” pynkut ka MPHRC. La ong u Bah Dino D.G. Dympep, Chairman, MPHRC.
