Shillong, Kyllalyngkot 16: Ka Seng Kur Kharraswai Kynrang Lawbah Zone, kan pynlong ia ka jingsam khusnam kyrpang ia ki samla pule kiba wan shakhmat bad ia uwei na ki riew rangbah ba la iaw bha ha ka rta uba long u Longkñi rangbah bad uba la long u nongsaiñdur ne nongprat lynti ia ka Seng Kur ha ki phew snem mynshwa bad uba la kot mynta ha ka rta 90 snem tam eiei, la ong u Bah Gilbert G Kharraswai, General Secretary ka Seng Kur Kharraswai, Kynrang Lawbah Zone, East Khasi Hills district.
U Bah G Kharaswai u la ong ba ka Seng Kur Kharraswai kan pynlong ia katei ka jingpynkup burom bad sam khusnam ha ka 30 tarik Kyllalyngkot ha Lawbah ka ban sdang naduh ka por 10:30 baje mynstep haduh ban da wai noh jong ka.
Ha katei ka sngi, u la ong ba kan don ka jingpynkup burom naduh ki hep kiba rit na ka kur, ki khun samla ka kur kiba wan shakhmat ha ka jingpule jong ki kata naduh Class I haduh kiba la pyndep ia ka Master Degree shajrong bad kiba ioh 70% ha ka marks jong ki.
Ia ki jingshisha lyngba ki dulir kum ki marksheet kin sngewbha ban pynpoi ha lane shwa ka 25 tarik Kyllalyngkot bad kito kiba phah hadien jong katei ka tarik yn ym pdiang shuh ne yn ym kyntiew shuh ia ka kyrteng jong ki ha ka bui ba la buh beit ryntih da ka seng Kur kumba la pynbeit bad na ka bynta kito kiba ju leh WhatsApp kin sngewbha ban phah ha une u number 82579 60682 lane shu phone kum ka jingpyntip.
Lah ban kdew hangne ba utei u rangbah ne u Longkñi ka kur Kharraswai u dei uba la kit kam ha ka seng Kur Kharraswai naduh ka snem 1985 bad mynta u la shakri kum u nongkitkam haduh 35 snem kata 1985-2020. Ka Dorbar Kur Kharraswai ka khot bad wer ia baroh ki para kur ki para jait ba kin sngewbha ban ia poi ryntih ha katei ka sngi kumba la buh bad ban burom lem ia ka por.
