Shillong, Kyllalyngkot 28: Mynta ka sngi ka iing bishar jong ka High Court jong ka jylla Meghalaya kala pynksan ia ka mutkotduma kaba la mudui da u Chief Executive member jong ka Khasi Hills Autonomous District Council u bah Latiplang Kharkongor pyrshah ia ka secretariat jong u Lat ka jylla Meghalaya halor ka jingpynslem ban ai ia ka jingmynjur ia ki Executive Member kiba la dep ban phah.
Haba kren ha ki lat pathai khubor u Bah Latiplang CEM jong ka KHADC halor ka rai jong ka High Court mynta ka sngi, u la pynpaw ia ka jingsngewnguh ia ka iing bishar kaba la ai ia ka rai halor ki kyndon kiba ka KHADC kala but ha kaba ia dei bad ka jingphah ia ki kyrteng jong ki EM sha u lat jong ka jylla ban ioh ia ka jingmynjur.
Ha halor ka jingkren jong ka sorkar ba kam ithuh ia u CEM jong ka KHADC u ba la shah jied hapoh ka iing dorbar kala paw biej shisha mynta, ka sorkar kam don bynta ei ei ruh em ban bethah ia u Lat jong ka jylla ha kaba ia dei bad ka jingthung ia ki EM. Kane ka jingjia baroh ka dei ba ka DCA kam shym la tip bha ia ki rule jong ka KHADC.
Na ka liang jong u CEM mynta ka sngi u la kynnoh kylla ba dei ka sorkar kaba la wanrah ia ka jingsynjor ha ka synshar khaddar hapoh jong ka KHADC. Da kane ka rai jong ka High Court u CEM jong ka KHADC u kyrmen ba u Lat jong ka jylla un ai noh ia ka jingmynjur ia ki EM kiba la dep ban phah kyrteng sha u Lat ka jylla.
