Shillong, Kyllalyngkot 30: Ka Meghalaya
State Pollution Control Board mynta ka sngi kala pynlong biang ia ka jingpynsngew paidbah halor ka jingkwah ka Star Cement Company Private Limited ban shim jaka biang sa 42.2 Hektar ha Brichyrnot ban khlong ia u Mawshun da katei ka kompeni.
Ha kane ka sngi ka jingpyrshah na ki paidbah kala jur bha, kane ka jingpyrshah ka long na ki trai shnong bad kum juh na ki seng bhalang jong ka jylla bad ki la pynpaw ha katei ka jingpynsngew paidbah ba kin kwah ban iohi ba ka kompeni kan dang shim jaka shuh.
Ka jaka bala buh ban pynlong ia kane ka jingpynsngew paidbah ha kaba nyngkong la dei ban pynlong ha Brichyrnot, hynrei ki bor pyniaid ia kane ka jingpynsngew paidbah la rah sha Lumshnong khlem da pan ia ka jingbit na ka dorbar shnong ban pynlong ia kane ka jingialang.
Na liang jong u rangbah shnong ka shnong Lumshnong ha khmat jong ka jingialang u la pynpaw pyrshah ia kane ka jingleh bad u la ong ba lada don kano kano ka jingjia kaba sngewsih mano ban shim ia ka jingkit khlieh bad ka jingpynkit kan leit sha ka shnong bad kumta u la pyrshah ia kane ka jingwan pynlong jingialang kaba khlem da ioh jingbit.
Ha kane ka jingialang paidbah ia kane ka jingpynsngew paidbah ia ka jingkwah katei ka Kompeni ban shim jaka shuh, ki seng bhalang kiba kyntup ia ka KSU,JSM, STIEH, HNYF, RJYF, HANM, FKJGP bad ka MPLU kila pynpaw ba ki pyrshah ia kane ka jingthmu jong ka kompnei ban shim jaka shuh.
Ki seng bhalang baroh kiba la leit sha katei ka jaka ban pyrshah ia kane ka jingpynsngew paidbah kila iarah ia la ki jong ki jong ki lama jong ki seng jong ki ha ryngkat ki paidbah kiba la ia poi sha kane ka jingpynsngew paidbah ban pyrshah ia kane ka jingpynsngew ka MSPCB ia ka jingkwah shim jaka shuh ka Star Cement Company Private Limited.
