Shillong, Kyllalyngkot 30: U myntri rangbah ka jylla Meghalaya u Conrad K Sangma mynta ka sngi u la ia kynduh ia u myntri kam poh iing ka sorkar pdeng u Amit Shah ha nongbah Delhi ha kaba u la ia kren ia ka rai jong ka iing dorbar thawain ka jylla ban pyntrei kam ia ka Inner Line permit (ILP) ha ka jylla Meghalaya.
Ha kane ka jingiakynduh mynta ka sngi na ka liang jong u myntri rangbah ka jylla u la iathuh ha u myntri kam poh iing ka sorkar pdeng ba ki kynhun na ka jylla Meghalaya ki kwah ban ia kynduh ia u ha kaba ia dei bad ka jingpyntrei kam ia ka ILP.
Ha kane ka jingiakren na ka liang jong u myntri kam poh iing jong ka sorkar pdeng u la kular ia u myntri rangbah ka jylla Meghalaya ba na ka liang jong ka tnad kam poh iing jong ka sorkar pdeng kan sa phah da ka jingthoh ha dien ka ilekshon MLA hapoh Delhi Union Territory.
Ha kane ka jingiakynduh u myntri rangbah ka jylla u la ia kren ruh ia kaei kaba jia hapoh jong ka Garo Hills Autonomous District Council bad ia kaei kaba jia hapoh jong ka Khasi Hills Autonomous District Council.
Ha kane ka jingiakynduh u myntri rangbah ka jylla u la pynsngew sha u myntri kampoh iing jong ka sorkar pdeng ha kaba ia dei bad kikam pynroi bad ka skhim kaba dei na ka Ministry Social Justice kaba dang sah mynta ban ioh ia ka jingmynjur jong ka Union kabinet.
Ha kane ka jingiakynduh na ka liang jong u myntri rangbah ka jylla Meghalaya nalorki kam kiba ia dei bad ka jylla Meghalaya u la ia kren ruh ia kiba bun kip hang ha kaba ia dei bad ka North East baroh kawei.
