Shillong, Rymphang 09: U bah Sanbor Shullai MLA jong ka 19-Shillong South u la leit ban ia kynduh ia u national general secretary jong ka party u Ram Madhav bad ha kane ka jingiakynduh u la ia kren ia ka jinglong jingman ha ka jylla namar ba ka BJP ka dei kawei na ki party ba don lang ha kane ka sorkar synrop ka Meghalaya Democratic Alliance.
Na ka liang jong u bah Sanbor u la pynshai ia kaei kaba u para MLA na ka party u bah AL Hek u kren ba um don jingtip ei ei ha kaba ia dei bad kata ka jingiabah ia ka shuki myntri. Halor kane u bah Sanbor u la pynkynmaw ba ia kane la ia kren bad ki nongialam jong ka party.
Na ka liang jong u bah Sanbor u la ong ba ia kane u kwah ban don ka jingiasngewthuh jingmut ha kane ka phang namar ba ka BJP ka don tang ar ngut ki MLA hapoh ka jylla Meghalaya bad lada ia bhah ia ka jinglong myntri kam iarap kham bha ia ka party ban plie ia ka lad ban khring ia ki nongialam sha ka party ha ka jaka ban wanrah ia ka jingbym ia shaniah.
Ha kaba ia dei bad u myntri rangbah ka jylla Meghalaya u bah Sanbor u don ia ka jingiohi ka jong u, ym kum u bah AL Hek u para MLA na ka BJP, na ka liang jong u bah Sanbor u la ong ba u ai ka jingkyrshan ia u myntri rangbah ka jylla u Conrad K Sangma bad ia kane ka bynta u shai bha namar ki long ka bynta jong ka sorkar ai ba kane ka sorkar kan long ka sorkar ba trei kam.
La ong ba lada ka don don ka jingiapher jingmut hapoh jong ka sorkar bad ka jingiakdew kti kan ialam bakla ha ka jaka ban pynioh ia ki polisi trei kam na ka bynta ka jingtrei kam jong ka sorkar. U la ai nuksa ka jignduna briew hapoh jong ka tnad pulit kane kala long ka jingeh kaba khraw ban tem ia ki kam sniew.
La ong ruh ba ka jylla Meghalaya ka dei ka jylla kaba dang ialeh ban kiew, ha kane ka liang jan baroh ki tnad sorkar ki dang don ha pdeng ka jingeh namar kane kam dei kaba dang mynta ban pynbeit ia kane don ban shim ia ki lad ki lynti ban pynbeit na ka bynta ka jingiaid beit iaid ryntih ha ka jingpyntrei kam.
Ia kine ki jingeh kiba ka jylla ka don yn nym lah ban weng hapoh ka shimiet, hynrei don kam ban don ia ka sorkar kaba khlain balah ban pyntrei kam na ka bynta ka jingmyntoi jong ki paidbah bad kane ka dei ban long ka thong jong ka sorkar na ka bynta u paidbah.
Haba ia dei bad ka jingkynnoh ba ka don ka jingiakhaii dewiong beain, na ka liang jong u bah Sanbor u ong ba dei ban pynsted ia ka jingaiti ia u dewiong ba dang don ha madan sha ka Coal India Limited kloi lan. Ia kane ka kam dei ban pynbeit naka bynta ka jingmyntoi jong ka jylla namar ka ioh ka kot jong ki paidbah ka jylla kala ktah shisha.
Ha ka jaka ban ia kdew kti, kum ki briew kiba ia don lang ha ka sorkar dei ban bthah ia u myntri rangbah ka jylla ba un pyntrei kam noh ia ka rai kaba la ai da ka iing bishar kaba ha khlieh duh jong ka Ri India ban pynioh noh ia ka Mining Policy bad ban ioh noh ia ka jingmynjur khang ba ka jingtih dewiong kan iaid beit noh ban weng na kane ka jingiatrei beain.
