Shillong, Rymphang 28: U Myntri ba dei peit ia ka jingsam marbam mardih jong ka jylla u James K Sangma u la iathuh ba ka cabinet ha ka jingiashong mynta ka sngi kala shimia ka rai ba ia ka jingsam khaw rashon, umphniang sharak bad tyngdong lyer kan long noh san snem.
Haba kren ha ki lad pathai khubor u James u la ong ba kane ka rai la shim katkum ka jingbthah jong ka tnad sam bam jong ka sorkar pdeng bad ka sorkar jylla ruh kala shim ia ka rai ba ia ka jingsam khaw, sharak bad tyndong lyer kan long noh san snem naduh ba ka sorkar kan sa pynmih ia ka jingpynbna sorkar.
La iathuh ruh ba ka cabinet mynta ka sngi kala shim ia ka rai ban don ka pisa hapoh jong ka tnad sam bam ka ban buh kyrpang kaba T.10 klur tyngka bad ha kane ka jingbuh ia ka pisa ka jingbei ka long 90% ym dei da ka sorkar pdeng bad 10% na ka sorkar jylla.
Haba ia dei bad ka GPF jong ki nongtrei sorkar kaba la don naduh ki snem 1985, ka sorkar kan sa weng noh ia katei kaba rim bad yn wanrah noh da kaba thymmai. Ka daw ka long ba ki rule jong ka GPF barim kala jrong palat.
Ban iarap ia ki jylla kiba la don ha ka jingduna pisa ka sorkar pdeng kala shah ia ki sorkar jylla ba kin lah ban pynkiew ia ka jingshimram na ka 3% jong ka jingmih ka jylla sha ka 4.1% jong ka jingmih ka jylla da kane ka sorkar jylla kan ioh ban shim ram tam da T.378 klur tyngka.
