Shillong, Lber 04: U Nongialam ka liang pyrshah hapoh ka iing dorbar thawain jong ka jylla u Dr Mukul Sangma na ka party Congress u la ong ba um hun ia ka Magisterial Inquiry halor ka jingjia hapoh Ichamati kaba la wanrah ia kane ka jingbym shong shngian.
Haba la kylli da ka kynhun tohkit kaba kumno dei ban thung, la ka dei da ka CBI, NIA lane da ka SIT, na ka liang jong u tei u nongialam ka liang pyrshah u Dr Mukul u la ong ba ka sorkar ka tip kham bha, halor ka Magisterial inquiry um don jingshah niah haei haei ruh ha kaba ia dei bad kane ka jingjia.
U Dr Mukul u la ong ba dei ban phah tohkit ha ka rukom kaba dei ban lap ia kito kiba don kti ban leh ia katei ka kam hapoh Ichamati, u la buh ruh ia ka jingkylli u myntri rangbah u tip ne em ia katei ka jingialang namar u myntri rangbah ka jylla man ka sngi u ioh ia ka “Direct Secret Information”.
U Dr Mukul u la ong ba dei ban tohkit ha kata ka rukom ba kito kiba don kti ha kine ki kam pynklumar kim dei ban lait na ka kti jong ka ain dei ban kem ia ki khang ba kan long ka jingmaham ia kiwei ruh ba kin nym lah klumar ha dien ha bud.
Na ka liang jong u nongialam ka liang pyrshah u Dr Mukul u ba la long teng ruh u myntri rangbah ka jylla u la kynthoh jur ia kane ka sorkar ba kam lah ban teh lakam ia ki jingklumar. Haba ia dei bad ka jingpynlait ia ka korphiew ha Police Bazaar bad Anjelee ki paidbah kim tip, namar kam biang ka rukom pynbna paidbah, u la kynnoh.
Utei u nognialam ka liang pyrshah u la ong ba ka dei ka kamram jong ka liang pyrshah ban kdew ia ka jingbakla jong ka sorkar jylla, u la ong ba ym tang ki liang pyrshah hynrei wat ki paidbah ruh ki don ia ka hok ban kdew ia ka jingbakla jong ka sorkar.
Na ka liang jong u Dr Mukul u la kyntu ruh ia ki paidbah ba to iatreilang ban wanrah ia ka shong suk shongsain ha ka jylla, kumba ka long ka jylla Meghalaya kala ioh ia ka nam ba ka jylla ka dei ka jylla kaba shong suk shongsain hynrei da kine ki jingjia kala pynsniew dur ia ka jylla. U nongialam ka liang pyrshah u kyntu ban ia treilang da baroh ban wanrah biang ia ka shong shong suk shongain.
