New Delhi, Lber 06: Ka tnad ka koit ka khiah jong ka sorkar pdeng kala pyntip paidbah ba mynta ka sngi la lap sa u wei u briew u ba don ia kane ka jingpang COVID-19 bad une u briew u dei u ba juh leit juh wan sha Thailand bad Malaysia, mynta u don ha pdeng ka jingpeitngor hapoh hospital. Haduh mynta ka sngi la pynthikna ba ki don 31 ngut kiba don ia kane ka jingpang kyntup ia ki 16 ngut kiba dei na Italy.
Katkum ka jingbthah ba baroh kito kiba wan lyngba ki kad liengsuin la peit bniah ia ki da ki briew jong ka tnad ka koit ka khiah jong ka sorkar pdeng haki 21 tylli ki kad liengsuin ha ka Ri bad mynta la pyniar shuh shuh sha ki 30 tylli ki kad liengsuin ia ka jingpeit bniah ia ki nongleit nongwan.
Na ka liang jong ka tnad ka koit ka khiah jong ka sorkar pdeng mynta ka sngi kala pynlong ia ka jinghikai kaba kyrpang ryngkat bad ka World Health Organisation ban iakren kumno ban iada ia kane ka jingpang ia kaba la plie da ka secretary jong ka tnad ka koit ka khiah ka sorkar pdeng ka Preeti Sudan ha nongbah Delhi mynta ka sngi.
Ha kane ka jinghikai ba kyrpang kiba la wan ban ia shim bynta ki long 280 ngut na ki jylla baroh bad na ki hospital, ka tnad rel, ka tnad shipai bad kila ia poi lang baroh ki long haduh 1000 ngut.
