Shillong, Lber 07: U Myntri Rangbah ka jylla u Conrad K Sangma u la kyntu ia ki paidbah kiba kynshew pisa hapoh jong ka Meghalaya Cooperative Apex Bank bad ha ka Meghalaya Rural Bank ba kim dei ban khuslai namar kaei kaba kine ki Bank ki shim ia ka jingiarap jong ka Yes Bank ka long tang ha ki liang ki kor mashin.
U Myntri Rangbah u la ong ba ka MCAB ka pyndon kam ia ki kor mashin jong ka Yes Bank tang ka bynta jong ka Mobile banking, IMPS, RTGS, NEFT bad ATM, katba ka MRB ka pyndon kam tang na ka bynta ban pynlait ia ki Cheque, katba kiwei kiwei kam don jingktah ei ei.
U Myntri Rangbah u la ong ba ka sorkar kala dep ban ai ka jingkular ba kan nym sei ia ka jingthep pisa jong ka sorkar na kine ki ar tylli ki Bank, namar ba kine ki Bank baroh ar tylli ki biang ka jingdon pisa jong ki.
U Myntri Rangbah u la kyntu ia ki paidbah ba kin iaishah khyndait ngi namar mynta ka jingiakren ia pynbeit bad kiwei ki Bank kala iaid sha khmat bad ha kane ka taiew ban wan la lah ban pynbeit ia kine ki jingthut kaba kine ki Bank ki ia kynduh.
Dei na ka jingbiang ka jingdon pisa ha kine ki bank ba ka RBI ha u snem 2019 kala ithuh ia kine ki ar tylli ki bank kum kila niew burom da ka RBI, kaba ki khot ha ka ktien nongwei ki Schedule Bank.
Haba ia dei bad ka jingpynsaphriang ia ki khubor lamer hapoh jong ki Social Medai na ka liang jong ka MCAB kala dep ban ai ia ka jingujor da ka ejahar hapoh jong ka Sardar Police Station.
Kine ki bank baroh ar tylli kila ia kren bad kiwei ki bank ban weng ia kane ka jingkaba ki iakynduh na ka daw jong ka jingbuh kyndon ka RBI ia ka Yes bank kaba ai ia ki jingkyrshan ia kine ki ar tylli ki Bank ha ka liang jong ki kor ki mashin, ia kane ka jingeh yn sa lah ban pynbeit noh kloi.
