Shillong, Lber 12: Mynta ka sngi u myntri rangbah ka jylla u la khot ia ka jingialang jong baroh ki seng sain pyrthei ban ia kren halor ka jinglong jingman ha ka shong suk ha ka jylla baroh kawei.
Haba kren ha ki lat pathai khubor ha dien bala kut ka jingialang bad ki seng sain pyrthei kaba la long mynta ka sngi ha secretariat u myntri rangbah ka jylla u Cornad K Sangma u la pynpaw ia ka jingsngewnguh ia baroh kiba la wan ban ia shim bynta ha kane ka jingalang.
La iathuh ba ha kane ka jingiakynduh mynta ka sngi baroh kiba la wan ban ia shim bynta ha ka jingialang kila pynpaw ia ka jingsngewkhia ha kaba ia dei bad ka shong suk shong sain ha ka jylla baroh kawei, kila ai ka jingkular ba kin ia treilang na ka bynta ka shong suk shong sain ha ka jylla.
Ha kane ka jingialang kila pynpaw ia ka jingsngewkhia ka jong ki ia kiei kiei kiba la jia ha kine ki sngi ha kane ka jylla khamtam ha kane ka nongbah Shillong, kila ia kren bun kip hang ha kane ka jingiakynduh mynta ka sngi.
Kila ia kren halor ka jinglong ka shong suk shong sain ha ka jylla, kila pynpaw ba ki long kiba la kloi ban ia treilang bad ka sorkar ban wanrah ia ka jingsuk, kila kren ia kaei kaba la jia ha Ishamati, ka jingpynjari ia ka korphiew ha kane jylla bad kum juh ka jingkhang ia ka Internet.
Ha kane ka jingialang la bun ruh kiba ai jingmut, ba dei ban don ki iew ha ki District, la ai jingmut ha kaba ia dei bad ki jingjia ha Langpih ban don ka Coordination Committee, bad ka jingiakynduh hapdeng ki myntri rangbah jong ki ar tylli ki jylla ka Assam bad Meghalaya.
Na ka liang jong u mytnri rangbah u la iathuh ba na ka liang jong u Chief Secretary la phah shithi sha Assam bad shen ki ar ngut ki myntri rangbah kin sa ia kynduh ban ia kren halor ki kam khappud.
U Myntri rangbah ka jylla u la ong ba wat la ki don ha ki seng sain pyrthei bapher bapher hynrei ki don tang kawei ka thong bad kata ka long ban wanrah ia ka jingsuk ha ka jylla.
Ka Dr Ampareen Lyngdoh MLA jong ka Conress kala ong ba ki long shai kdar bay n nym lah ban ia pein na ka bynta ban pynneh ia ka shong suk shong sain, kiwei kiwei ki nongialam seng sain pyrthei kila wan ban ia shim bynta ha kane ka jingialang kaba la khot da u myntri rangbah ka jylla.
