Shillong, Lber 13: U Lat jong ka jylla u Tathagata Roy haba kren hapoh ka iing dorbar thawain ka jylla ha ka sngi sdang jong ka dorbar mang tyngka 2020-21, u la pynpaw ia ka jingsngewkmen ka jong u ba ka iing dorbar jong ka jylla Meghalaya ka dei ka iing dorbar kaba bat ia ka burom bad u la ong ba ia kane ka burom kaba la ioh dei ban pynneh pynsah.
Haba kren halor ka shong suk shongsain ha ka jylla, u Lat jong ka jylla u la ong ba ia ki kam lehnoh ha kane ka jylla lah ban pyndem, lait noh tang katto katne ngut kiba dang son sha Bangladesh, ka seng lehnoh Hynniewtrep National Liberation Council’s (HNLC) ki kam jong ka mynta ka long tang ban phah kyrwoh bad buh jingthoh ha ki social Media.
Ha kane ka jingkren u Lat u la kdew ruh ba kane ka kynhun lehnoh HNLC kala pynpaw ia ka jingkloi jong ka ban ia kren ia suk, hynrei na ka liang jong ka sorkar ka ieng skhem ha ka nongrim ba ka jingkhang jong ka sorkar ban ia kren ia suk ka plie tang lada ki sangeh noh ia ki kam pyntriem.
Ka sorkar jylla ka ai jingiarap na ka bynta kito ki kynhun lehnoh kiba la pynkut noh ia ka seng jong ki bad ka ai jingiarap ruh ia kito kiba wan ban pyndem wait ha khmat jong ka sorkar lyngba ka skhim kaba kaba la tip kum ka “Revise Scheme for Surrender-cum-Rehabilitation of Militants in the Norh East.
U lat jong ka jylla u la kdew ba ka jylla kala iohi ia ka jingiakhih da ki seng bhalang halor ka Citizenship (Amendment) Act, 2019 bad ka jingdawa jong ki ban pyntrei kam ia ka Inner Line Permit ha kane ka jylla, ha kaba ka sorkar kala khot ia ka dorbar ba kyrpang ha ka 19th Nohprah 2019 ban shim ia ka rai ban pyntrei kam ia ka ILP ha ka jylla ban iada ia ki trai jylla, halor kane ka sorkar jylla ka dang ia kren bad ka sorkar pdeng.
Haba ia dei bad ki jingiakhih pyrshah ia ka CAA bad ka jingdawa ban pyntrei kam ia ka ILP ha ka jylla la lah ban teh lakam da ka jingtrei ki pulit jong ka jylla. Hynrei kala don ka jingjia kaba sngewsih ha ka 28th Rymphang 2020 ha Ichamati ha kaba kala don ka jingiakajai ha pdeng ki ar kynhun kaba la wan rah ia ka jingkhlad jong u Lurshai Hynniewta bad ka sorkar kala pynlait pisa T. 2 lak tyngka kum ka jingiarap.
Hab ia dei bad kiba mynsaw na ka liang jong ka sorkar kan bei pisa ia ki ha kaba phah sumar ia ki. Ka sorkar ka sngewkhia jur ruh ha kaba ia dei bad ka jingshah bom ki briew ha ki paidbah ha ki thain Syntung, na ka liang ka sorkar ka kyntu ia ki paidbah ban ialeh ban pynneh pynsah ia ka shong suk shongsain.
Nalor kitei ki bynta u Lat jong ka jylla u la kren ia shibun kiwei kiwei ki bynta ha kaba ia dei bad ka jylla ha kaba u la kdew ia jan baroh ki tnad sorkar bad ia kaei kaba ka sorkar kala leh bad kiba ka sorkar dang leh ha kane ka snem kaba bynta.
