Shillong, Lber 17: U Minister jong ka tnad Home (Jail) u Bah AL Hek u la pyntip ba ka sorkar jylla kala dep ban ai ia ka jingmynjur na ka bynta ban shna pynheh noh ia ka Shillong District Jail na ka bynta ban pyllait ia ka jingkhap ngiah bad la mang haduh T. 8,46,45,000 klur tyngka.
Haba jubab ia ka jingkylla ba la wanrah da u MLA ka Mawsynram u Bah Himalaya Shangpliang ha ka kynta kylli jingkylli ha ka dorbar mang tyngka u Bah Hek u la iathuh ba baroh ki koidi kiba shah set hapoh ka Shillong District Jail ki don haduh 440 ngut ba kynthup ia 422 ngut ki Shynrang bad 18 ngut ki kynthei.
U Bah Shangpliang haba kylli halor ka jingmang ban set ia ki koidi na ka liang jong u Bah Hek u la iathuh ba ka jingmang ban set ia ki koidi ha Shillong District Jail ka long 170 ngut ba kynthup ia ki Shynrang 135 ki kynthei 15 ngut bad kiba buh ha high security ki long 20 ngut ki shynrang.
“Nga la sngewthuh shai ba katno ka long ka jingkhap ngiah hapoh ka Shillong District Jail namar ba ka jingmang ban set ka long tang 170 ngut hynrei kumba long mynta ki don haduh 440 ngut bad nga la ioh jingruh ba ka don ka jingkhap ngiah wat haka thiah ka dem bad la don ruh ba ki koidi ki hap ban thiah ruh wat ha khrum jingthiah” ong u Bah Shangpliang.
Shuh shuh u Bah Shangpliang u la bynrap biang ba kane ka jingkhap ngiah jong ka jail kala buh jingeh ia ki koidi ba shong patok bad nga kwah ban ioh jingshai na u minister ba kiei ki lad ki lynti ba ka sorkar kala shim ban pynkylluid ia kane ka jingkhap ngiah bad na ka liang jong u Minister u la ong,
“Ka sorkar kala dep ban ai ia ka jingmynjur jingmynjur na ka bynta ban shna pynheh noh ia ka Shillong District Jail na ka bynta ban pyllait ia ka jingkhap ngiah bad la mang haduh T. 8,46,45,000 klur tyngka bad na ka liang jong ka PWD (Building kala dep ban pynbiang ia baroh ki jingdonkam ha kaba iadei bad ka tender).
U Bah Hek u la pyntip ruh ba ka sorkar kala dep ban mang kumba T. 27.60 klur na ka bynta ban tei ia ka District Jail ba thymmai ha Nongstoin bad shisien ba kane ka District Jail ha Nongstoin kala dep ki koidi na West Khasi Hills bad kumjuh ruh na South West Khasi Hills District un sa pynkynriah noh sha ka District Jail, Nongstoin na Shillong District Jail.
Shuh shuh u Bah Hek u la pyntip ba kumba 30 ngut kiba la shah rai pynrem la pynkynriah noh na Shillong sha Nongpoh Jail na ka bynta ban weng ia ka jingkhap ngiah jong ka Shillong District Jail.
Haba twad jingtip u Bah Shangpliang u la kylli ba kane ka jingthmu ban pynheh ia ka Shillong District Jail kan ym ktah ne pynkhap ngiah ia ka jail, na ka liang jong u minister u la pynpaw ba em kan ym pynkhap ngiah namar ba ka jaka kadei kaba heh bad ki koidi kin rung kumba 102 ngut lada lah dep ban shna pynheh ia ka jail.
Shuh shuhu Bah Shangpliang u la ong, ia baroh ki koidi kynthei la set lang ha kajuh ka kamra hynrei katkum ka jingmang ka long tang 5 ngut bad kiei kita ki lad ki lynti ban shim na ka bynta ban pynkylluid ia ka jaka set ia ki kynthei kaba don tang kawei ka jaka leit bar bad kawei ka jaka sum, u Bah Hek u la ong mar mar ka sorkar kan shim khia na ka bynta ki koidi kynthei ban shna ar kamra tang na ka bynta ki koidi kynthei.
Shuh shuh u Bah Sangpliang u la pynpaw ba ha Shillong District Jail ia kiba dang kham rit ka rta la set lang bad kiba la shah rai pynrem bad kane lehse ka lah ban don ka jingtieng ioh ba ki shah ialam bakla, na ka liang jong u minister u la ai khublei ia u MLA ka Mawsynram uba la ai jingmut bad un sa peit halor kane ka bynta.
Kiwei kiwei ki MLA kiba la bynrap lang ia kane ka jingkylli ki kynthup ia u Bah PT Sawkmie, u Dr Azad, u Bah Charles Pyngrope, u Zenith Sangma, u Saleng Sangma bad u Bah George B Lyngdoh.
