Shillong, Lber 17: Namar ka jingsheptieng ia ka jingpang Corona Virus ne ka COVID-19 kaba la saphriang sted bha ha kylleng ki ri jong ka pyrthei bad kumjuh ruh ha ki jylla jong ka ri India, na ka liang jong ka Dorbar Shnong Mawlyngbna ia mynta shipor kala khang noh ia ki jaka jngoh kai pyrthei kiba don hapoh u pud u sam jong ka shnong.
Kum ban shu kdew ba ka Dorbar Shnong Malwlyngbna ka don ha ka thain Lawbah bad ka jingpaw nam ha kane ka dong ka thain bad kumjuh ruh ha ka jylla hi baroh kawei kadei namar ka jingdon jong ka Dam Umkhakoi ha kaba kala khring bha ia ki briew na kylleng ki jaka ki wan ban tuid sha kane ka thain.
Ia ka shnong Mawlyngbna la bna ha kylleng ki jaka jong ka ri India bad kumjuh sha bar ri namar ka jingdon jong ki jaka kiba itynnad kiba khring bha ia ki briew na kylleng ki jaka ban wan tuid sha kane ka dong ka thain.
Hynrei na ka liang jong ka Dorbar Shnong Mawlyngbna hadien ka jingpur sted jong ka jingpang Corona Virus, hynnin ka janmiet kala shong kyrkieh ia ka Executive Committee jong ka Dorbar Shnong ha kaba kila shim ia ka rai ba ia mynta shipor kin khang lut ia baroh ki jaka jngoh kai pyrthei kiba don hapoh u pud u sam jong ka Dorbar Shnong Mawlyngbna.
Ia kane ka rai jong ka Dorbar Shnong Mawlyngbna la pyntip paidbah da u Bah Lurshai Tohtih uba dei u dkhot jong ka Executive Committee jong ka Dorbar Shnong Mawlyngbna ha kajuh ka por u dei ruh u Secretary jong ka Mawlyngbna Multi Purpose Society.
Na ka liang jong u Bah Lurshai Tohtih u la pyntip ba ka Dorbar Shnong Mawlyngbna ia mynta shipor kan khang shwa ia ka jingwan jong ki nongwan jngohkai pyrthei kiba nabar ri bad kumjuh ruh ia kiba nabar jong ka jylla Meghalaya.
Shuh shuh u Bah Lurshai u la iathuh ruh ba ka Dorbar Shnong kala rai ruh ban khang shwa shipor wat ia ki local ne ki briew kiba dei na ka thain ban wan sha kine ki jaka jngoh kai pyrthei kiba don hapoh u pud u sam jong ka Dorbar Shnong Mawlyngbna.
U Bah Lurshai u la pyntip ruh ba kane ka jingkhang ia ka jingwan jong ki tourist kan trei kam noh mardor hadien ba la rai ka Executive Committee jong ka Dorbar Shnong bad ia ka jingplie pat ngin sa ia peit haba la kham I biang ba ka pyrthei ka mariang ka long kumno.
Na ka liang jong ka Dorbar Shnong kila kyrpad ia ki paidbah ba kim dei ban sngew eiei namar ka jingkhang shwa shipor ia ki jaka jngoh kai pyrthei kiba don hapoh u pud u sam jong ka Dorbar Shnong namar kane ka jing saphriang sted jong ka jingpang Corona Virus.
Ki jaka jngohkai pyrthei kiba hap hapoh ka jingpeit jong ka Dorbar Shnong Mawlyngbna kaba don hapoh ka thain Lawbah kaba don sharum jong ka Mawsynram ka lynti ban leit sha Hat Mawdon ki kynthup ia ka Dam Umkhakoi, Guest House, Split Rock, Umdiengkaiñ Water Fall, Treking sha Iew Luri Lura bad ki Fossil Area.
Ia kine ki jaka ba ka kdew na ka liang jong ka Dorbar Shnong Mawlyngbna ia mynta shipor kan khang ia baroh bad un ym shah ia ki nongwai jngoh kai pyrthei ban leit sha kine ki jaka tad haduh ba ka Dorbar Shnong Mawlyngbna kan pynbna da kumwei pat la pyntip u Bah Lurshai.
