Shillong, Iaiong 01: U Myntri Rangbah ka jylla u Conrad K Sangma mynta ka sngi u la ai bor ia baroh ki Deputy Commissioner jong ka jylla ba kin pynlait noh ia ka pisa kaba T.25 lak tyngka na ka skhim MLA jong u snem 2020-201 sha baroh ki nongmihkhmat paidbah.
La bthah ia baroh ki MLA ba kin phah noh ia ki kyrteng jong ki marbam kaba ki ktah ban thied khnang ban ki DC kin ioh ban pynlait ia ka pisa. La kyrpad ruh ia ki MLA bad ia ki MDC ba kin ia treilang ba ki bor jong ki District Administration ban pynthikna ba ki marbam kim dei ban duna. Ha kum kane ka por baroh naduh ki nongmih khmat paidbah, seng bhalang ba kin ia treilang bad ka sorkar.
Ha kane ka por ka kyntu ia ki MLA jong ki District bapher bapher ba kin ai jingmut lem sha ka sorkar kumno ban dang kham pynbha shuh shuh ban poi sha ki paidbah. Ki myntri sorkar kiba la pynkham ti ban peit ia ki District kila trei shitom ban peit ia ki jingeh kaba ki dong bad ki thain ki ia kynduh.
U myntri rangbah u la pynpaw ia ka jingsngewnguh ba baroh ki ia treilang ha kane ka por, na ka liang jong ka sorkar kala shim ia bun ki lat ki lynti kumno ban ialeh ha kane ka jingeh kaba ia kynduh kaba khlem poi pyrkhat. U myntri rangbah ruh u la kubur ia ki jingud jingman jong ki briew na kylleng bad ka sorkar ka ialeh ban pynbeit ia ki jingeh.
Haba jubab ia ki jingkylli halor u COVID-19 kaba la don ha Assam, u myntri rangbah u la ong ba katkum ka jingbthah ka tnad kam poh iing ka sorkar pdeng la khang ia ka jingiarung ia mih ki briew na kawei ka jylla sha kawei pat bad na kawei ka District sha kawei pat.
U Myntri rangbah u la ai ka jingiaroh ia baroh ki nongtrei kiba la trei shitom ha kane ka jingialeh pyrshah ia ka kane ka jingpang COVID-19. U la kyrpad ruh ia ki paidbah ban ia treilang bad ka sorkar ha kane ka jingpakhang khang ban khanglad ia kane ka jingpang ba kan ioh rung ha kane ka jylla bad ban pyniap iakane ka jingpang da kaba ia jngai iwei na iwei.
