New Delhi, Iaiong 03: U Myntri Khynnah jong 
ka Sorkar Pdeng ba dei khmih ia ka Tnad Development of North Eastern Region, Dr Jitendra Singh u la pynlong ka jingiamir jingmut ba bniah lyngba ka Video Conference, da kaba bud ia baroh ki jingbthah jong ka jingiajngai iwei na iwei, bad ki ophisar jong ka Tnad DoNER, North Eastern Council (NEC) bad ka NEDFI ha kaba iadei bad ka jingsaphriang ka jingpang COVID 19 bad ki sienjam ba la shim ban iakhun ia kane ka jingpang ha ka thain shatei lammihngi.
Ha kane jingialang la ia donlang u Secretary jong ka Tnad DoNER, Addl Secy MDoNER, Secretary NEC, CMD North Eastern Development Finance Corporation Ltd (NEDFi) bad kiwei kiwei ki heh ophisar jong ka MDoNER bad NEC. Ha kane ka jingialang, u Myntri u la pyntip ba 100% ka kam jong ka Tnad ka la long lyngba ka e-Office, kaba pynsuk ban treikam katkum ki jingbthah jong ka sorkar ban trei na iing.
La pyntreikam pura ia ka pakhang shnong ha ki jylla ka thain shatei lammihngi. La khang ia ki jaka khappud ba don ha ka thain shatei lammihngi kaba long kumba 5500 km.Baroh ki ophisar bad ki nongtrei jong ka Tnad DoNER bad ki kynhun jong ka bad ki PSU lyngba ka NEC, NEDFi, NEHHDC, NERAMAC, CBTC bad NERCOMP ki la nohsynniang shi sngi ka tulop jong ki sha ka PM-CARES fund. Ka NEDFi ka la noh synniang T. Ar klur sha ka PM-CARES fund na ka CSR fund jong ka.
Kumba la rai nyngkong, ka Ministry lyngba ka NEC ka ladep ban mang pisa T. 25 klur sha ki Jylla ka thain shatei lammihngi ban iakhun ia ka jingpur ka COVID-19. Kane ka pisa kan long ha ka dur jong ka untied fund, kaba lah ban pyndonkam ha kino kino ki kam ba iadei bad ka jingpang COVID-19, bad ka bym kynthup hapoh ki song jingiarap ba don mynta jong ka Sorkar Pdeng.
Ka jinglah ban pynkhih ia ki untied fund kan pynlah ia ki jylla ban treikam kloi. Kane ka pisa kan long kaba la pynmang lang haduh bad ki fund ba la mang da ka Tnad DoNER lyngba ka NEC sha ki Jylla ka thain shatei lammihngi hapoh ki scheme ba la don lypa.
Ha kane ka jingmang pisa na ka tnad DONER, ka Arunachal Pradesh ka ioh T.3.25 klur, Assam T.5.00 klur ka jylla Manipur, Nagaland, Mizoram, tripura bad ka jylla Meghalaya ki ioh mar T.3.00 klur, ka Sikkim ka ioh T.1.75 klur.
Ka Tnad ka la kyrpad ruh ia ki projek ban pynkhlain ia ki jingdonkam ba iadei bad ka koit ka khiah ha ki jylla ka thain shatei lammihngi hapoh ka flagship programme jong ka NESIDS. La bthah ia ki jylla ban phah ia ki jingtyrwa jong ki hapoh ka 6 tarik Iaiong. Yn sa mang tyngka hakhmat tam ia ki projek ba iadei bad ka koit ka khiah.
