Shillong, Iaiong 16: ka Deputy Commissioner jong ka East Khasi Hills District mynta ka sngi kala pynbna pa ia ka korphiew hapoh ka nongbah Shillong baroh kawei bad ki sawdong jong la pynjari naduh ka por 6.00 baje mynstep jong ka 17 tarik bad kan kut haduh ka 20 tarik por 6.00 baje mynstep jong mynta u bnai Iaiong.
Kane ka korphiew kan nym trei kam na ka bynta ki shipai, ki pulit, ki nongtrei ka MeECL, kiba don ha ki jaka ai jingsumar, ka tnad sam bam, ki lat pathai khubor, ki petrol pump, kiba san Gas, ka Municipal, ki lad phah jingtip, ia ki dukan die lang bad kum juh ia ki dukan die dawai.
Ia kine kiba la pynlait na ka korphiew ki dei ban but ryntih ia kaei kaba ka tnad ka koit ka khiah kala batai khlem da bakla. Ia ki kali kiba kit ia ki shipai, ki pulit bad ia ki marbam mardih, ki kali kit ia ki dawai la shah ia ki ban iaid hynrei ia ki nongniah ki hap ban bud ia ki kyndon kiba la buh.
Kane ka hukum kan nym trei kam ruh na ka bynta ki dukan rashon, ki dukan die lang bad ia ki dukan kiba yn sa dang pynbna na ka por sha ka por ha ryngkat ka jingpynbeit lang jong ki pulit. La khang pyrshah ban iaid sha ki jaka paidbah khlem da deng ia ki masks.
Na ka liang jong ka DC kala pyntip ruh ba ki dukan die khaw rashon, ki dukan die marbam ha ki shnong ki thaw kin plie ha ka 18/04/2020 kata la sngi saitjain ha baroh ka nongbah Shillong bad ha ki shnong kiba hap hapoh jong ka East Khasi Hills District.
