Shillong, Iaiong 22: Ki 25 tylli ki kali Ambulance kiba la thied na ka Chief Minister Relief Fund (CMRF) kila poi mynta ka step ha Shillong bad ka jingpynkhreh ia ki ban pyndon kam kala iaid sha khmat.
Ia kine ki kali baroh 25 tylli ka buh ha ophis jong ka 108 kaba don ha Lawmali bad ka jingpynkhreh ia ki ban weng ia ki dak ba la thoh da kawei ka ktien ban thoh pat da ka ktien phareng ban ia sngewthuh ki paidbah.
U Myntri rangbah u la ai khublei ia baroh kiba la ia don kti ha kane ka jingnoh syniang ha kaba la lah ban thied ia kine ki 25 tylli ki kali Ambulance ban pyndon kam na ka bynta ka jingmyntoi jong ki paidbah.
U Myntri ka koit ka khiah jong ka sorkar jylla u Bah AL Hek haba kren ha u SP News Agency la iathuh ba la poi ki 25 tylli ki Ambulance thymmai kiba la phah lyngba ka National Health Rural Mission (NHRM) kine ki Ambulance ki don ha Shillong mynta ban pyndon kam.
Da ka jingthied 25 tylli ki Ambulance na ka CMRF ban pyndon kam hapoh jong ka 108 bad ka jingioh ia ki 25 tylli ki Ambulance na ka NHRM baroh ki Ambulnance thymmai ha ka jylla kila don baroh 50 tylli.
