Shillong, Iaiong 27: Ka kynhun ki riew paidbah kaba la saindur ha dien bala don kane ka jingkhang na ka daw jong ka jingpang COVID-19 kaba la ai kyrteng “Team We Care” mynta ka sngi kala leit ban ai ia ki Shield Masks hapoh NEIGRIHMS bad ia ki jain khyllung hapoh Children Hospital Shillong.
U Nongialam kane ka kynhun u Kailash Verma haba kren ha ki lat pathai khubor u la iathuh ba ia kine ki Shield Mask la shna hi da ki briew jong kane ka kynhun ia kaba la leti ban ai mynta ka sngi sha NEIGRIHMS.
Ki jain kiba la leit ban ai sha Children Hospital la leit ban ai ia ki namar ba ha kane ka por ki dukan die jain ki khang. Kine ki jain kiba la leit ban ai ki long baroh ki jian thymmai. Ki jain kiba la ai ymdei tang ki jain phong hynrei kynthup ruh ia ki blanket khyllung.
Kane ka kynhun ha kine ki sngi kiba la dep kala sam ia ki jingbam sha ki briew kiba duk ha ki bynta bapher bapher hapoh kane ka nongbah Shillong bad ki shnong kiba ha khap sor.
