Shillong, Jymmang 01: U President jong ka KSU jaintia Hills District Unit u Samla Ohibait Dkhar la ong ba kum ka seng ka pynpaw ia ka jingpyrshah jur halor ka jingthmu jong ka sorkar jylla ban wan rah ia kita ki 30 tylli ki truck kit dewiong na ka jylla Assam
ban wan sha ka jylla.
Kine ki 30 tylli ki trok kit dewiong ka long ba kin pynbiang dewiong sha ki company cements kiba don ha poh East Jaintia Hills District. Ka KSU ka buh ka jingkylli hato lada ia u dewiong ki lah ban wan kit naduh guawahati, te balei ka sorkar kam ailad ia ki briew ka jylla kiba treikam dewiong naduh 40 snem ne tam wat haduh mynta.
Ka KSU ka buh ka jingkylli, balei kane ka sorkar kam tip mo ba u dewiong u la don lypa hapoh ka jylla bad khmatam eh ha poh East Jaintia kumno pat ka phah ia u tei u juh u marpoh khyndew ban kit na kiwei pat ki jylla kane ka paw shai ba ka sorkar kam khein snep ia ki briew la jong.
Ka seng ha ka jingiadei bad kane kumno ka sorkar wat ha kaba kum kane ka saw ka sian jong ka jylla bad ki ri ha ka pyrthei baroh ki ia klumar jingmut ha ka jingidei bad ka jingpur sted jong u khniang jingpang uba ngi khot COVID 19, hynrei mynta pat ka sorkar ka dang kwah ban ia lehkai ia ka jingim tang ban biang ki kam jong ki company cements la kynnoh ka KSI.
Ka KSU ka ong ruh, ban phah wan ia ki briew na ki wei pat ki jylla,te lada jia ba ka sorkar ka shah ba kin wan lait lan ha kaba kum kane ka por, ka pyni ba kam don jingmut ia ka sorkar ba kan pynbna ia ka lockdown hapoh ka jylla jong ngi katba ia ki kam buit sianti jong ki ki iaid beit thik thik.
Ka seng ka dawa jur ba da lei kam lah ban pdiang ia kaba kum kane ka jait kam ha kaba kum kane ka por ba dang hiran bha, te balei ka sorkar ha ka jingshisha ka dei ban pyrkhat shwa ia ki paradoh parasnam naduh ki nongtrei ne ki khynnah pule kiba don shabar jong ka jylla kiba kwah ban wan phai sha la ka jong ka jylla ne ka iing ka sem.
Na ka liang jong ka sorkar pat haduh mynta kam pat lah ban wanrah ia ki sha ka jylla la jong katba ia kita ki company cements pat khlem da khein ki wan na kano kano ka jylla tang ban bha ka kamai lah ban shah ia ki ba kin iaid lait lan man la ka sngi hapoh ka jylla, katba ma ki trai jylla pat wat inter district lada iaid ki hap shah pynshitom ha ki bor jong ka ain.
Hato ia kiba kum kine ki jait kam kumno ka ain kam lah ban teh lakam kaei kane i mat ka don kaei kaei na sha lyndet ong u Ohibait Dkhar President KSU jaintia Hills District Unit. Ka KSU ka dawa ba ka sorkar ka dei ban pynsangeh shuwa ban shah ia kine ki 30 tylli ki trok ban wan kit dewiong.
Na ka liang jong ka KSU kala kren shai ba lada jia ba ka sorkar kam lah ban pynsangeh kum ka seng kin hap ban iaid da kawei pat ka lynti, te lada jia kano kano hapoh ka jylla jong ka sorkar bad ki company cements kin hap ban shim ia ka jingkitkhlieh. La ong u samla Ohibait Dkhar Presdient ka KSU Jaintia Hills District Unit.
