Shillong, Jymmang 01: U Symbut myntri rangbah ka jylla u Bah Prestone Tynsong u la iathuh ba ka sorkar kala shim ia ka rai ban naduh sngi nyngkong la shah ia ki kali kamai ban iaid 25% lait noh ha Shillong bad khap sor Shillong. Ban pynbeit ia kane la aiti sha ki Deputy Commissioner bad ki District Transport Office ba kin ia pynbeit ia kane.
Ha ka juh ka por u Bah Prestone u la ong ba ka sorkar ka dang khang ia ki kali jong ki riew shimet ym pat shah ban iaid, kiba don kam ki hap ban shim ia ki pass kali kumba juh leh, la pynshai u symbyt myntri rangbah ka jylla.
U bah Prestone u la iathuh ba ka sorkar kala shim ia ka rai ban shah noh ban trei ha ki jaka par kiba la ioh ia ka laisen na ka sorkar, kum ka Lafarge bad kiwei kiwei kiba ia dei bad ki kam tih marpoh khyndew. Na ka liang jong u myntri u la kren shai ba ka jingiashallan ka dei ban long tang ha poh jong ka Ri, ban shallan sha bar jong ka Ri ka sorkar kan dang khang.
La ong ruh ba ia ki karkhana la shah ban plie, ia kiba don ha EPIP ha Byrnihat , Umiam hapoh jong ka Ri Bhoi District, ha Jaintia Hills, West Khasi Hills bad Garo Hills la shai ban kin plie tang ba ki trai ki hap ban shim ia ka jingkit khlieh ban nym wan rah briew na shabar lada lap yn khang khyrdep ia kata ka karkhana.
Haba ia dei bad ki karkhna pynmih dewbilat, ka sorkar kala pan ia ka kaiphot na ki bad hadien ba ka sorkar kala ioh ia ka kaiphot na ki kan sa shim ia ka rai. La hap ban leh ia kane namar ba kine ki karkhana ki don kam ia shibun ki tiar kiba hap ban wanrah na sha bar ka jylla.
Kitei ki jingtrei baroh kiba ka sorkar kala shah ban trei kila lah ban sdang naduh ka 4th Jymmang 2020 kata ka dei ka sngi nyngkong. U Myntri u la ong ba baroh hap ban bud ia ki kyndon kiba la pynmih na ka tand ka koit ka khiah ha kaba ia dei bad ka jingiapynjngai.
