Shillong, Jymmang 01: U Bah Prestone Tynsong Symbut myntri rangbah ka jylla mynta ka sngi u la pyntip ba la shai ka sngi ka sorkar kan sa pynmih ia ki phom ban register ki samla pule bad kito kiba trei sha bar ki jylla na North Eastern State ba kin pyndap lada ki kwah ban wan phai noh sha la iing.
U bah Prestone u la ong ba nalor kaba phom kaba kin sa pynmih la shai ka sngi ka sorkar kan sa ai ruh ia ki telephone number ba ki briew ki lah ban phone ban pyntip sha ka sorkar ba ki kwah ban wan phai iing.
Haba ia dei bad ka jingwan phai ka sorkar kan nym lah ban leit shaw ia ki, hynrei ki hap ban wan da ki trai lane ki plain kata ka shong ha ka jingpynlait jong ka sorkar pdeng, na ka liang jong ka sorkar jylla kala kloi ban pdiang ia ki ba kin wan phai sha la ka jylla ba kin ia don bad kiba ha iing ka sem.
Haba ia dei bad ki samla pule kiba don hapoh ki jylla jong ka dong shatei lam mih ngi jong ka Ri India u Bah Prestone u la iathuh ba haduh mynta kiba la register bad ka sorkar kila kot sha ka 1500 ngut bad ka sorkar kala dep ban pynkhreh ban pdiang ia ki ba kin wan phai sha la ka jylla.
Haba ia dei bad ka jingwan phai jong ki samla pule bad kiba trei sha bar jong ka jylla u bah Prestone u la kren shai ba ynda ki wan phai ki hap ban sah hala ki iing 14 sngi lynter bad ka sorkar kan pynbiang ia ka bam jong ki baroh shi iing ba kin nym ia mih ban ia khleh hapoh kitei ki 14 sngi.
La iathuh ba la shai ka sngi ka sorkar kan khot ia ka jingialang ia ki khlieh nongsynshar shnong ban ia kren ia kane ban ia trei lang namar tang ka sorkar kan nym lah ban leh khlem ka jingiatrei lang jong ki bor shnong. Ha kane ka jingialang kins a pynsngewthuh sha ki khlieh nongsynshar shnong ia ki kyndon kiba ka sorkar kala dep ban pynkhreh kumno ban but ryntih ia ki.
