Shillong, Jylliew 04: Ka KSU Lawbah Border Area Circle ka pynrem jur hakaba ia dei bad ka ruko
m shna bill light jong ka FEDCO ha kaba ka la shu trei tang dep rukom khlem da pynshitom bad kane la lap ba ia ki bill light jong ki paitbah ki lah pynslem ban shna kata da ki bun bnai bad ki don kiba la poi snem ruh khamtam ia ki bill Jong kito ki BPLU, BPLM bad Saubhagya scheme.
Kane ka jingpynslem ban shna iaki bill ka wan rah jingeh ia shibun ki long iing ba duk namar ka poi kynsan da ki hajar shi synpoi haka jaka ba kin siew ki jingdonkam ha ing hynrei kin hap ban siew noh iaki bill jong ki.
Kumjuh ruh ka jingkiew ka bill ka lah pynshitom ia shibun ki paitbah hakaba ngim lah sngewthuh hakano ka rukom ba ki kheiñ hynrei la lap ia shibun ki jingduna bad jingdkoh haka jingtrei kam jong kane ka company na Orissa .
Ka long kaba sngewsih ba don ki long ing kiba la leit ban iakren ia ka jingkiew ka bill hynrei na kaliang ka office ki shu pynbun kam iaki paitbah khlem da pynbeit kloi ia kata.
Ka seng ka buh jingkylli ba ki paitbah bapli katno sien kin leit pynlut ksan sha Mawsynram tang na bynta katta ka bill light, Ka seng ka la lap ba ka jingtorti jong kane ka company ka long ba mynta ki la don ki long iing kiba lah shah ot noh bad kim shym lah pyndonkam bording shuh hynrei kaba sngewkhia ka long ba ka FEDCO ka dang shna bill shait shait.
Kane ka paw shai ba ka jingtrei Kam Jong ka FEDCO ka long ka thurmur haduh katta katta hakaba ki paitbah ki shem jingeh bha . Kumta naka liang ka seng ka pynpaw iaka jing sngewkhia halor kane bynta bad haka juh ka por ka seng ka kyntu ba ki dei ban peit bha bad shim khia iaka la ka jong ka kamram ba ki trei.
La ju lap khamtam ha kine ki bnai lyiur ka ju jia ba ka jinglip bording manla ka por khamtam haki thaiñ Phlangwanbroi sharum hynrei ban pynmeh pat ka shim por bha.
Kane ka jing pynlip bording ba khah khah ka wanrah jingeh bha haka rukom trei jong ki paitbah bad kumjuh iaki samla pule kiba donkam ban leh iaki online class nala ki shnong ki shnong jong ki namar kane ka lockdown.
Kane ka jingshim sting jong ki nongtrei ka wanrah iaka jing duh bakhraw iaki paitbah ba pyndonkam bording hapoh ka thain. Kumta naliang ka Seng ka kyntu ba kim dei shuh ban trei jaituh haba ki shakri ia u paitbah hynrei kin sngewbha ban shim khia bad pyndep hok iala ka kamram, la ong u u samla Samborlang Shabong, President KSU Lawbah Border Area Circle ha ka kyrwoh kaba la phah mynta ka sngi.
