Shillong, Naitung 13: Ka “Lockdown” kaba ar sngi ia kaba la pynbna da ka sorkar ban ialeh pyrshah ia ka jingsaphriang ka khlam COVID-19 kala sdang mynta ka sngi ha kaba ki paidbah nongshong shnong kane ka nongbah Shillong kila burom ia kane ka jingkhot ka sorkar iaka Lockdown kaba ar sngi lynter.
Ha kane ka sngi sdang jong kane ka Lockdown kaba ar sngi ki surok ha kane ka nongbah Shillong kila kynjah jar bad ki kali kiba don ia ka pass jong ki ruh ki duna kiba iaid ba ieng mynta ka sngi, wat ki briew ruh duna kiba ia mih ha ki surok dong bad surok shnong.
Ka sorkar namar ba kala pynbna ia kane ka Lockdown hynrei kala pynbut ruh sa ia Koprhiew kaba ar sngi hapoh kane ka sor Shillong baroh kawei ha kine ki ar sngi lynter ba ka don kano ka jingpakhang kaba ka sorkar kala dep ban pynjari.
U myntri rangbah ka jylla u Conrad K Sangma u la ong ba kane ka jingpynjari ia ka Lockdown kaba ar sngi ka long ban pynsuk ia ki briew jong ka tnad ka koit ka khiah ba kin ia kynduh “Contact Tracing” ia kito ki briew kiba don ka jingiadei kaba jan bad ki nongleit iathoh sha Greenwood Resort ha Assam.
