Shillong, Naitung 19: U Director ka tnad ka koit ka khiah u Dr Aman War u la iathuh ba mynta ka sngi yn tep don burom ia u bah Banteilang R Syngkai hapoh ka shnong Mawlieh ha Ri Bhoi District bad ia u Nandeshwar Deury BSF yn thang ha Mawbah, Mawprem.
La iathuh ba u bah Banteilang u la wan phai na Kolkatta bad ha dien ba la wan phai ha u buh ia u ha quarantine centre, na ka daw ba u la ud ba don ka jingpang ha ka kpoh, la rah ia u sha NEIGRIHMS ha ka 5 tarik mynta u bnai ban sumar bad haba la test ka long Positive bad la rah ia u sha ka jaka sumar COVID.
Katba dang don ha pdeng ka jingsumar u la ioh ia ka jingpang pynhiar bad mong ki khyllai bad ha ka 17 bad 18 tarik haba la test la shem ba la long Negative, hynrei ha ka jan miet jong ka 18 tarik u la shitom bad u la shem jingeh ban ring mynsiem la rah ia u sha jaka ba don Ventilators hynrei ha ka por 11.56 baje mynmiet u la khlad noh.
Haba ia dei bad u Nandeshwar Deury la iathuh ba la test COVID-19 postive ha ka 4 tarik mynta u bnai bad la rah ia sha Composite Hospital jong ki BSF bad na kane ka jaka sumar la rah ia u sha Civil Hospital Shillong ha dien ba la ud la rah ia u sha NEIGRIHMS ha ka 13 tarik mynta u bnai.
Mynta ka sngi une u shipai u la ud ba ym lah ban ring mynsiem bad u la khlad noh ha ka por 2 naje myntsep. U Dr War u la iathuh ba kane ka jingtip kaba u la ai ka long katkum ka jingthoh kaba la ai na katei ka Hospital sha ka sorkar mynta ka sngi.
