Shillong, Naitung 19: Kyndit kynsan ha ka janmiet jong ka 18 tarik u Naitung 2020, u lyoh uba dum u la wan kah ia ka iing ka sem, ka shnong ka thaw bad ia ka Khasi Students’ Union (KSU) baroh kawei.
U samla Belovedson Dome, u samla rangbah uba long u General Secretary jong ka KSU Dima Hasao District Unit, Assam u la leit noh na kane ka sla pyrthei sha lyndet ki lyoh ban ia don noh ha syndah u Trai Nongbuh Nongthaw.
U samla Belovedson Dome udei uwei na ki rishot ba skhem jong ka KSU naduh ba u la pyniasoh bad ka ha u snem 2014 kum u dkhot bad u long ruh uwei na ki dkhot ba nyngkong duh jong ka KSU DHDU. Katba nang iaid ki sngi, une u samla u la pyni ia ka jingtbit, jingshlur bad jingshit rhem jong u ban len lade bad shakri ia ka Jaidbynriew lyngba ka KSU.
Ha ha shithi sngewlem sha kiba ha iing, u samla Lambok Starwell Marnger bad u general secretary ka seng u samla Donal V Thabah kila pynpaw “Ma ngi baroh ki dkhot ka KSU ngi pynpaw ia ka jingsngew tmang kaba jur halor ka jingkhlad syndet une u khun samla uba ngi ju ia trei lang na ka por sha ka por”.
Wat la ka lynti ka long kaba jngai bad ka jylla ruh nawei, hynrei ka jingiajan bad jingiaieid kam khang ia ka jingiakynduh bad jingiatreilang na ka por sha ka por. U samla Beloved u dei u samla u bym ju pep ia ki kam seng lada dei ha Assam ne wat ha Shillong ruh.
Namar kane ka khlam COVID-19 ha kaba la khang ia ka leit ka wan na kawei ka jylla sha kawei pat, kum ka seng ki pynpaw ia ka jingsngewsih kthang namar kim shym la ioh shim bynta lang ha ki jingleh niam kiba khatduh jong une u samla hynrei ka KSU ka kular ha khmat jong phi ki bahaiing bahasem ba tang shu lait ka lynti ne ioh lad ngin sa wan mih ban ai jingtngen ia ka iing ka sem ka jong I bad kumjuh ruh ban leh burom ia i.
Ka KSU ka phah ia kane ka khubor sngewlem sha phi ki bahaiing bahasem u samla Belovedson Dome bad ka pyntip ba ka KSU kan don ha ryngkat bad phi ha shi lynter ki sngi.ka seng kan iai pyrta ia ka jingshakri jong, leit sukh samla Belovedson Dome, ia ka shithi sngewlem la soi da u president samla Lambok Starwell Marngar bad u samla Donald V. Thabah General Secretary Khasi Students’ Union. 
