Shillong, Nailur 29: U bah Lambor Malngiang MLA bad MDC jong ka Nongkrem konstitwensi u ba dei ruh u shongknor jong ka Meghalaya State planning Board mynta ka sngi u la pynkup burom ia ki 63 ngut ki ASHAs bad 80 ngut kiba dei ki Aganwadi namar ka jingtrei shitom jong ki ha kane ka jingialeh pyrshah ban iada na ka jingsaphriang u COVID-19.
Ia kane ka jingpynkup burom la pynlong ha Salem Secondary School, Laitkor,ha kaba la ai ia ki jingsah kynmaw ryngkat ka pisa kaba T.3000/- tyngka ia ki ASHAs bad T.2000/- tyngka ia ki Aganwadi namar kila trei shitom ha kum kane ka por ba don kane ka khlam COVID-19.
Ha ka jingkren jong u Bah Lambor u la ai ka jingiaroh ia ki ASHAs bad ia ki Aganwadi namar kila noh syniang kaba khraw bha ha kane ka jingialeh ka sorkar pyrshah ia kane ka jingpang kaba la wan lynshop ha ka jylla. Kane ka jingai ka long kaba rit hynrei ka long ruh ka dak ban pynpaw ia ka jingsngewnguh ia ka jingtrei jong ki.
Ha kane ka jingpynkup burom u la ong ba u la shim khia ban ia kren bad ka sorkar ha kaba ia dei bad ka jingsiew ia ki bad mynta ka jingiakren ka dang iaid ha pdeng ka sorkar jylla bad ka sorkar pdeng bad dang ap ia ka jubab.
Ha kane ka sngi la leh burom kyrpang ruh ia u Bah Banjoblang Lyngdoh Mawlong, u ba la trei lynter san bnai ha Smit Quarantine Centre, ha kane ka sngi la pynsngewruh ia kiei kiba u la leh kum u MLA bad MDC ha kine ki sngi naduh ba la sdang kane ka khlam.
Kiwei kiba la kren ha kane ka jingalang pynkup burom ki long u Block Development Officer ka Mylliem C&RD Block, u bah Peter T Passah, Block Development Officer jong ka Mawryngkneng C&RD Block, u bah Ronnie Wahlang bad ka Additional DHMO, Dr. Mrs A Lyngdoh.
