Mawkyrwat, Nailur 30: Ka KSU
Photjaud Rangthong Unit kaba dei kawei naki shnat treikam jong ka KSU hapoh South West Khasi Hills District, hapoh ka jingialam jong u Samla Everwell Robin Thongni u ba dei u President jong ka KSU Photjaud Rangthong Unit ryngkat ka jingsynran lang ki dkhot jong kane ka Unit mynta kila leit ban ia kynduh ia u Executive Engineer jong ka PWD Mawkyrwat Division, South West Khasi Hills District halor ki artylli ki mat.
kawei ka dei haba iadei bad ki surok ne ki lynti syngkien hapoh ka dong ka thain ba ka surok Mawkyrwat – Mawmerang – Rangthong kaba hap hapoh ka jylli pyniaid kam jong ka ophis Public Work Department Road Mawkyrwat Division ka la sniew palat kumba ka long mynta.
Kum ka seng ngi la lap ba ka rong ka la khoh lut bad kane ka la wanrah jingeh iaki paitbah ba leit ba wan khamtam eh ia kiba dei ban iaid manka sngi. Ka jingkhoh jong kane ka surok ngi iohi ba kan nang sniew ar shah lai shah lada ym lah ban leh eiei haka por kaba biang.
Ka mat ka ba ar ka long ba kane ka surok Mawkyrwat -Mawmerang – Rangthong kum ka seng ngi la lap khamtam ha ki bynta shwa ban poi ha shnong Mawmerang ba kam biang iaki nala um bad ngi la lap khamtam haka por slap ba ka um ka tuid napdeng surok namar kam don iaki nala ba biang bad kane ngi iohi kum ka seng ka kan nang pynsniew shuh ia shilynter ka surok lada ka ophis kam lah ban pynbiang ia ki nala um.
Kaba sngewkmen ka long ba na ka liang u Executive Engineer jong ka PWD Mawkyrwat Division marsin ioh katei ka jingujor na ka liang ka seng u la ong ba na ka liang jong u ruh u la i sangsot ha kaba iadei bat kitei ki surok bad u la ong ruh ba un shimkhia shikatdei eh halor katei ka kam bad u la kular ruh ba un sa phah daka jingthoh sha ki bor bahalor jong ka sorkar ba kan dup seisoh pura.
Kawei kaba sngewtynnad ka long ba u la pynpaw ruh ba un ialeh katba lah ban pynïoh syndon daka surok ka ba thymmai namar ban shu maramot tang katto katne por ka lah ban jot biang bad u la ong ruh ba da dei ba ioh surok thymmai ha ki bnai tlang yn ïoh ban sdang ban pyntrei noh ia katei ka surok, kane ka long katkum ka kyrwoh kaba la phah da u samla Widerstune Thongni u dei u Publicity jong ka KSU Photjaud Rangthong Unit.
