New Delhi, Risaw 13: Ka Tnat Expenditure hapohka Tnat Kam Pla Tyngka, mynta ka sngi ka lah aijingbit ia ki 20 tylli ki jylla ban pynioh da T. 68,825 klur lyngba ka jingshim ram.
Lah aijingbitia kito ki jylla kiba lah jied ia ka lad ba nyngkong ba kin shim ram shuh shuh ha ka 0.50% jong ka Gross State Domestic Product (GSDP). Ka Tnat pla tyngka jong ka Sorkar Pdeng ka lah ai ar tylli ki lad ia ki jylla ba kin pyndap ia ki jingduna ba lah mih hadien ka jingpyntreikam ia ka GST.
Ha ka jingiakynduh jong ka GST Council ba lah long ha ka 27 tarik u Nailar, 2020 lah rai ban ai kine ki lad bad lah pynbna ia kane sha ki jylla ha ka 29 tarik u Nailar, 2020. 20 tylli ki jylla ki lah jiedia ka lad ba nyngkong.
Kine ki long ka Andhra Pradesh, Arunachal Pradesh, Assam, Bihar, Goa, Gujarat, Haryana, Himachal Pradesh, Karnataka, Madhya Pradesh, Maharashtra, Manipur, Meghalaya, Mizoram, Nagaland, Odisha, Sikkim, Tripura, Uttar Pradesh bad Uttarakhand. Don 8 tylli ki jylla ki bym pat jied haduh mynta.
Ki jylla kiba jiedia ka lad kaba nyngkong mynta ki lah ban, Pyndonkam ia ka lad shim ram kaba lah pynbeit da ka tnat pla tyngka jong ka Sorkar Pdeng khnang ban shim ram ia ka pisa ba duna na ka khajna. Ia ka jingduna ka khajna ha ki jylla baroh lah antad ba kot haduh T 1.1 lak klur.
Ki lah ioh jingbit ruh ban shim ram haduh 0.5% jong ka GSDP na ka 2% ka jingshim ram shuh shuh ba lah mynjur da ka Sorkar India namar jong ka khlam COVID, da kaba weng noh ia ki kyndon ban wanrah jingkylla.
Ka tnat Expenditure, ha ka 17 tarik u Jymmang, 2020 ka lah kyntiew ia ka jinglah shim ram shuh shuh ki jylla sha ka 2% jong ka GSDP. Ia ka bynta ba khatduh kaba 0.5% na kane ka 2% lah pyniasoh bad ka jinglah ki jylla ban wanrah kumnokumno 3 na ki 4 tylli ki jingkylla kumba lah buh kyndon da ka Sorkar India.
Hynrei ha kaba iadei bad ki 20 tylli ki jylla kiba lah jied ia ka lad ba nyngkong ban pyndap ia ka jing duna na ka jingpyntreikam ia ka GST, lah weng noh ia ka kyndon ba hap ban wanrah ia kine ki jingkylla lada kwah ban ioh shim ram kaba 0.5% jong ka GSDP.
Kumta, kine ki 20 tylli ki jylla kiba lah jiedia ka lad ba nyngkong ki long kiba lah khreh ban pynmih ia ka T. 68,825 klur lyngba ka jingshim ram. Ia ki kamba iadei bad ka jingpynbiang ban shim ia kane ka ram dang trei laka jong.
Katkum kane ka jingbit kaba la ai jingbit da ka tnad pla pisa jong ka sorkar pdeng, na ka 0.05% ka jylla Meghalaya ka lah ban shim ram na ki iew paidbah ka ban kot sha ka T.194 klur tyngka.
