Shillong, Risaw 26: U Chairman ka Khasi Hills Autonomous District Council (KHADC) u Bah Pynïaid Sing Syiem ha ryngkat bad u Chief Executive Member (CEM) u Bah Titos Chyne hynne ka sngi kila plie paitbah ïa ka KHADC New Channel ka ban pynphriang jingtip ba kham janai sha ki paidbah ïa ka rukom trei kam jong ka District Council bad ka jingtrei kam ka Executive Committee.
Ia kane ka KHADC New Channel yn pyni paidbah lyngba ki Youtube bad kumjuh ruh ha ka sla Facebook jong ka KHADC New Channel bad kumjuh ruh ha Instagram lyngba ki social media khang ba ki paidbah na kyndong kynshrot mynta kin ïoh jingtip ba bniah ïa ki kam ba ka EC bad ka KHADC ki trei.
U Chairman ka KHADC u Bah Pynïaid Sing Syiem haba ai jingkren ha shwa ban plie paidbah ïa katei ka Channel u la ong, “Ka daw ba ngi ïaid sha khmat ban pynlong ia kane ka kam mynta ka sngi kumba phi ïohi kadei halor ka jingduna palat jong ka jingtip shaphang ka jingtrei ha Council bad kumjuh ruh ïa ka nongrim jong ka KHADC” ong u Bah Pyniaid.
Ka District Council kadei ka stieh ban ïada ïa ka jaitbynriew hynrei haba don ka jingbakla barit hangne hangtai ha ka jingiaid lynti jong ka council ki don kiba khwan myntoi shimet kiba ym sngewtynnad ïa ka District Council ki pynpaw noh sha ki social media ba la dei ban pynduh noh ïa ka District Council bad ki don ki briew kiba khlem tip ia ka jingshisha ki ïa mynjur lang ia kata ban ong hooid lah dei ban pynduh hynrei lyngba kane ka Channel mynta kin ïoh ïa ka jingtip bad ka jingshai kaba janai, ong u Bah Pyniaid.
“Ngi don ïa kata ka jingkit khlieh ba da kiei ki lad ki lynti ban pynlong ba ki paidbah kin ïoh ïa ka jingtip ba bniah bad ngi lap ba dei satang ha kane ka juk jingstad mynta ba lyngba ki youtube channel bad kiwei kiwei ki prokram ba ka KHADC ka leh bad ki paidbah ki don hok ban ïoh jingtip” ong u Bah Pynïaid.
U Bah Pynïaid u la ong, Ha kawei ka liang ka EC ka bun bha ki kam bad ki mat ba ïa kaei ka committee kan ïoh ban trei nangne sha khmat bad mynta ki paidbah kin tip lut bad kumjuh ruh halor ki rai ba kongsan jong ka EC lyngba kane ka channel ka jingtip ki paidbah kin ïoh kan long kaba janai bha, u la ong.
Shuh shuh u la pynpaw ba ki MDC ka KHADC kiba trei ïa kino kino ki jait kam hapoh la ka Constituency bad ki don ki MDC kiba ym lah ban khot man ka por ïa ki nongthoh khubor hynrei da kaba ngi don ïa la ka jong tang da kaba phi shon dur ne ring dur ia ki kam ba phi trei bad kane ka kynhun kan sa thep ha ki youtube bad kiwei kiwei ki social media, ong u Bah Pyniaid.
Na ka liang jong u Chief Executive Member (CEM) u Bah Titos Chyne haba ai jingkren u la pynpaw ïa ka jingsngew kmen ba hapoh ka jingïalam jong u Bah Pynïaid kum u Chairman ka KHADC ngi la lah ban leh ïa kane ka channel lajong jong ka KHADC bad kane ka channel kan ïarap ym tang ïa ka KHADC hynrei ïa baroh ki MDC kiba kwah ban pynphriang ïa kano kano ka khubor.
“Lyngba jong kane ka channel ngi lah ban phah ïa ki prokram ba ki don hapoh ki constituency bad kane ka la kham suk ban pynphriang ïa ki khubor namar ka jingdon la jong ka channel” u la ong bad bynrap ruh “Kan dei ruh kawei ka lad ba ki paidbah kin kham tip shuh shuh shaphang jong ka KHADC bad kumjuh ruh ïa ki kam ba man ka sngi kiba kum ka KHADC ka trei” ong u Bah Titos.
Ha kane ka sngi la ia don lang ruh ki Executive Member (EM). Ïa ka jingïalang ba lyngkot la pynïaid da u Bah B Sohtun uba dei u Secretary ka Legislative Wing ka KHADC.
