Shillong, Naiwieng 03: Mynta ka sngi kala don ka jingialang ha pdeng ka sorkar Meghalaya bad ka Ri Israel ha Pinewood Shillong ban ia kren kumno ban pyndon kam ia ki kor ki bor jong kane ka juk kaba mynta ban kyntiew ia ka kam rep soh bad rep jhur ha kane ka jylla.
Haba kren ha ki lat pathai khubor ha dien ka jingialang u Myntri Rangbah ka jylla u Conrad K Sangma ba ka sorkar kala shim ia ka rai ban buh ar tylli ki jaka kum ki nongmuna ban hikai ia ki paidbah, ha Jongsha East Khasi Hills District na ka bynta ka rep jhur bad ha Dawagre ha East Garo Hills na ka bynta ban rep soh.
Haba ia dei bad kane kala don ka jingiakren bad ka sorkar pdeng ban pyndon kam ia ki kor ki bor jong ka Ri Israel ban kyntiew ia ka rep ka riang ha kane ka jylla Meghalaya bad na kitei ki ar tylli ki jaka yn sa pynphriang sha kiwei ki bynta jong ka jylla bad kane ka jingiatreilang kan iarap ban kyntiew ia ka rep ka riang ha ka jylla.
U Myntri Rangbah ka jylla u la ong ba, ban buh ia kine ki ar tylli ki jaka ban kyntiew ia ka rep ka riang ha ka rep jhur bad rep soh ka sorkar pdeng kan bei pisa kumba T.10 klur na ka bynta kawei kawei ka jaka bad kane ka jingiakren ka dang iaid bad ka sorkar pdeng mynta.
U Nongkit ktien ka Ri Israel sha Ri India u Dr Ron Malka u la ong ba haduh mynta ka Ri Israel kala ioh ban buh kumba 29 tylli ki jaka hikai ha karep ka riang ha kane ka Ri India bad mynta ki sngewkmen ban don bynta hapoh ka jylla Meghalaya bad ka ei kaba kin leh ka long, kumno ban pyniaid ia ka um namar kane ka jylla ka don ia ka kata ka bynta ba lah ban leh bun kiei kiei.
Kumba ka long mynta ka jingiadei ha pdeng ka Ri India bad ka Ri Israel ka long kaba ia jan bha bad ka don ka jingthmu ban don ia ka jingpyniaid ia ka eroplane na Guwahati sha Tel Aviv bad na ka bynta ban trei ha kane ka thain shatei lam mih ngi kin buh ia ka ophis ha Assam.
Haba jubab ia ki jingkylli hato kane kan iarap ne em ban pynbha ia ki soh ki jhur kiba la don lypa ha kane ka jylla ne kin wanrah na shabar, u nongkit ktien ka Ri Isreal u la ong ba kin ia peitlang hynrei ka Ri Isreal kan pynbiang ia ki kor ki bor bad ki jinghikai.
