Shillong, Naiwieng 04: U Symbut Myntri Rangbah ka jylla u bah Prestone Tynsong mynta ka sngi u la pyntip ba ka sorkar jylla kan sa wanrah ia ka “ St, Xavier University Bill” ha kane
ka sien shong dorbar ka ban sdang la shai ka sngi.
Haba kren ha ki lat pathai khubor u symbut myntri rangbah ka jylla u la ong ba ia ka applikoshon la dep ban phah da ki nongpyniaid ia kane ka skul bah sha ka Regulatory Board kaba ka sorkar jylla ka thaw bad kane ka board kala ai ia ka jingmynjur jong ka bad ka kabinet kala ai ia ka jingmynjur ban rah sha iing dorbar ban pynlong ain.
Kiwei ki rai kiba ka kabinet kala shim mynta ka sngi ka long ban wan rah ia ka jingpynkylla ha ka Meghalaya Farmers Commission Amendment Bill, 2020 bad ha kane ka jingpynkylla ka long tang ban buh ia ka kyndon ba u Chairman u dei ban long hapoh ka 65 snem ka rta.
Ha kane ka sngi ka Kabinet kala rai ruh ban bteng biang ia ka kam kontrak jong u Secretary jong ka Meghalaya State Consumer Dispute Redressal Forum u H N Areng sa shisnem.
Haba ia dei bad ka jingthied ia ki stamp kaba ki paidbah ki don kam man ka sngi ka kabinet kala shim ia ka rai ban sdang noh ban die ia ka E-Stamp kane ka long ban pynsuk ia ki paidbah kiba don ha kylleng jong ka jylla.
Ha kane ka jingialang ka kabinet kala pdiang ruh ia ka jingtyrwa jong ka M/s Sew Energy Private Limited ban pyndam noh ia ka jingiasoi soskular ha u snem 2010 bad ka sorkar jylla na ka bynta ka Rangmaw Hydel Power Project.
Ka daw ba ka kompeni ka kwah ban pyndam noh ka long ba kane ka jaka bala mang ban shna ia ka jaka pynmih bor ding eletrik ka long ka bym biang, kat kum ka soskular kaba la ia soi kane ka jaka kan pynmih ia ka bor ding eletrik 65MW.
U bah Prestone u la ong ba ka sorkar kan sa pynkhreh da kawei ka “ Expression of Interest” na ka bynta kito ki jaka pynmih bor ding kiba don ja ka jylla.
