Shillong, Naiwieng 06: Ka KSU Mawkasiang Unit myn ha ka 5 tarik u Naiwieng 2020 ka la phah shithi sha u Director ka North East Institute of Ayurveda & Homeopathy ban kyntu ia u ban plie noh ia katei ka hospital ban ioh jingiarap ki paidbah.
Ka KSU Mawkasiang Unit ka la leh ia katei ka kam hadien ba ka la ioh ia ki jingud jingnam na kiba bun ki paidbah khamtam kito kiba ju leit shim dawai bad phah sumar ha katei ka hospital. Ka NEIAH ka la khang ia ka hospital naduh ba sdang ka lockdown kata u bnai Lber.
Ha ka shithi ka KSU Mawkasiang Unit ka la kyntu ia ki nongpyniaid ka NEIAH ban plie noh ia ka out-patient bad in-patient section jong ka hospital khnang ba ki paidbah kin ioh ban wan shim dawai bad phah sumar na katei ka jaka ai jingsumar. La ong u samla June Jimmy Nongdhar President ha ka kyrwoh kaba la phah mynta ka sngi.
