Shillong, Naiwieng 9: U Myntri Rangbah ka jylla u Conrad K Sangma haba jubab ia ka mat jingiakren kaba la wanrah da u bah Process T Sawkmie u la kyntu ia ki paidbah jong ka jylla ban pynneh pynsah ia ka shongsuk shnongain ha ka jylla.
Haba ia dei bad ka jingleit pynlong ia ka jingiakhih ha khmat iing jong ka jylla Meghalaya ha Kolkatta na ka liang jong u myntri rangbah u la ong ba ka sorkar Meghalaya kala ia kren bad ka sorkar jong ka West Bengal halor kane. Na ka liang jong ki pulit ruh ki khlem shah ban rung hapoh Meghalaya House Kolkatta.
Haba ia dei bad ki jingkynnoh ha kaba ia dei bad kata ka jingshah lehbein jong ki kynthei khynnah hapoh Ichamati na ka liang jong ka sorkar kumba la bthah kala phah tohkit bad ka koit kaba la ioh ka long ba kam don kata ka jingshah lehbein ki kynthei khynnah.
Katkum ka kaiphot kaba la ioh ka long ba kala don ka jingeh ha ka ioh ka kot namar kane ka COVID-19 bad ka jingbym pynthymmai ka KHADC ia ki trading License ha kaba ka sorkar kala dep ban ia kren bad kin but katkum ki kyndon ain kaba ki don.
U Myntri rangbah u kyntu ba ym dei ban shu ai kano kano ka jingkren ha kaba ai dei bad kam khlem da tip shai, la iathuh ba kala don ka jingai dorkhas sha ka ophis jong u myntri rangbah duh jong Ri India, sha u Lat ka jylla bad kum juh sha ka ophis jong u myntri rangbah ka jylla.
U Myntri rangbah u la ong ba kane ka jingjia kala mih na ka daw jong ka jingiakajia ha Ichamati ha kaba ka kynhun KSU kala pynlong ia ka jingialang ban pyrshah ia ka CAA ha ka 28/2/2020 bad ha kane ka jingjia u wei na ki dkhot ka seng u Lurshai Hynniewta u khlad bad halor kane ki pulit kila kem 24 ngut bad na kine la pynngat mukotduma ia ki 17 ngut.
U bah Process haba wan rah ia kane ka mat ia kren hapoh ka iing dorbar u la ong ba ka sorkar ka dei ban shim khia bad khamtam ia u lat ba rim jong ka jylla u ba la kren lyngba ka Twitter jong u ban pynshit bad ban pyniashruid jaidbynriew.
Kaei kaba la jia ka long ba ka jylla ka don ha ka jingshong suk bad wat ka lehniam puja ruh kala iaid beit iaid ryntih khlem da don kano kano ka jingjia kaba sngewsih, hynrei ka sorkar ka dei ban shim khia namar ka jingshah ujor kala poi sha ka ophis jong u myntri rangbah duh jong ka Ri India.
La ong ba ki paidbah jong ka jylla Meghalaya kim don kano kano ka jingpyrshah ia ki briew kiba dei ki trai shnong jong ka Ri India, hynrei kaei kaba ki pyrshah ka long ia kito ki briew kiba wan rung beain na ka ri Bangladesh bad ka sorkar ka dei ban thung ia ka kynhun tohkit ha kaba ia dei bad kane namar ba ym don ba long halor jong ka ain.
