Shillong, Naiwieng 10: U Myntri Rangbah ka jylla haba jubab ia ka mat jingiakren halor ka jingpynlut ha kaba ia dei bad ka jingiakhun ia ka khlam COVID-19 kaba la wanrah da u bah Process T Sawkmie, bah Himalaya Muktan Shangpliang, u bah Gearge B Lyngdoh bad u bah Kimfa S Marbaniang, u myntri rangbah u la ong ba haduh mynta ka jinglut baroh ka long T.399 klur tyngka.
Haba batai ia kane ka jinglut u Myntri Rangbah u la ong ba, na ka tnad ka koit ka khiah kynthplang na ka National Health Mission ka long T.271.2 klur, na ka Revenue & Disaster Management (SDRF) ka long T. 23.7 klur, na ka Revenue & Disaster Management (PM CARES) ka long T.3.5 klur, na ka Chief Minister‟s Relief Fund (CMRF) ka long T.7.4 klur, na ka Chief Minister‟s Special Grant ka long T.14.7 klur.
Na ka Mining & Geology Department (DMF) ka long T. 8.9 klur, na ka Labour Department T.51.0 klur, na ka Community & Rural Development and Urban Affairs (SRWP & SUWP ) ka long T. 15.1 klur, na kane ka skhim la ai sha ki MLA mar T.15 lak tyngka ban ia iarap ha kane ka por COVID-19, na ka Urban Affairs T.3.5 klur baroh ka jingpynlut ka long T.399 klur haduh mynta.
U Myntri Rangbah u la iathuh ba na kane ka jinglut baroh kaba ka sorkar kala pynlut T.399 klur ka sorkar kala dep ban siew T.251 klur bad kaba dang sah kaba ka sorkar ka hap ban siew ka long T.148 klur.
Ka sorkar kala wat kilat ki lynti na ei ban ioh pisa ha kane ka jingiakhun pyrshah ban teh la kam ia kane ka khlam COVID-19, ka sorkar kala ioh nalor kaei kaba ka jylla don ka long , na ka National Health Mission ka long T.43.4 klur, na ka State Disaster Response Fund (SDRF) ka long T.23.7 klur, na ka Prime Minister‟s Citizen Assistance and Relief in Emergency Situations Fund (PM CARES) ka long T.3.5 klur.
Na ka Chief Minister‟s Relief Fund (CMRF) T.7.4 klur, na ka District Mineral Foundation Fund (DMF) T.8.9 klur, na ka Meghalaya Building and Other Construction Workers Welfare Fund (MBOCWWF) T. 12.9 klur, na ka North Eastern Council (NEC) T.3 klur, na ka Member of Parliament Local Area Development Scheme (MPLAD) T.1 klur, ha kaba baroh ka jingioh pisa ka long T.103.8 klur.
U Myntri Rangbah u la ong ba ka jingpynlut ia katei ka pisa ha kane ka jingiakhun pyrshah ia ka khlam COVID-19 ka long ha kaba test ia ki paidbah lyngba ka RTPCR/TruNAT/CBNAAT, kumba ka long haduh mynta la test haduh 2.14 ngut ki briew bad ka jingiap ka long 0.9% ha ka jylla.
U Myntri Rangbah u la ong ba ka sorkar kala pynbha ia ki jaka ai jingsumar bad la ai ruh sha ki MLA Lyngba ka SRWP bad SUWP mar T.25 lak tyngka ban iarap ia ki paidbah ha kane ka jingeh kaba ki paidbah ki ia kynduh.
La ong ba ha kaba sdang ka sorkar jylla ka hap ban shaniah ha ka NEIGRIHMS na ka bynta ban test COVID-19 namar ba naduh ba sdang ka jylla kam don ia ka Biosafety Level 2 category laboratory ha ka jylla hynrei mynta la buh ia ki ar tylli ki jaka test ha ka jylla kawei ha Shillong bad kawei ha Tura bad mynta dang ialeh ban kyntiew ia ki sha ka Biosafety Level 3. Ha kane ka por jingiakhun pyrshah ia u COVID-19 la lah ban kham pynbha ha ki lat jingsumar.
Ka sorkar kala lah ban buh ia ki jaka test ha baroh 11 tylli ki District ha ka jylla bad kawei ha Mairang, hynrei da ka jingkiew kiba ioh COVID-19 positive ka sorkar kala pynlong ia ka jingtest kyllum ia ki paidbah ban lap ia ka jingshisha ba kane ka jingpang kala saphriang paidbah.
Ha kane ka jingiakhun kala sorkar kala hap ban thung shibun ki briew bad ka jinglut ka long T.15 klur, na ka bynta ka jingtest la pynlut T.38.9 klur, ha ki 25 tylli ki Conra Care Centre bad ka jinglut ha kaba pyniaid ia kine ka long T. 30.8 klur, la ong ba shuwa ba kan don kane ka khlam ki Ventilator ki don tang saw tylli hynrei mynta la don palat ia ka 200 tylli bad kiba la dep ban buh mynta ki long 79 tylli.
Haba ia dei bad ka jingshim wai ia ki Hotel, ki quest House ban pynsah quarantine ia ki nongtrei ka tnad ka koit ka khiah bad ia ki ophisar ka long T.2.67 klur, la ong ba ki Ambulance ha ka jylla ki don tang 158 tylli hynrei la lah ban thied thymmai sa 25 tylli, ka sorkar kala iarap ruh ia ki 10,049 ngut kiba sah kut sha bar ka jylla la ai jingiarap T.3000/- tyngka marwei.
Ka jinglut ha kaba siew ia kabai lynti jong ki briew kiba wan phai na sha bar ka jylla ka sorkar kala pynlut T. 2.85 klur, ha kaba ai bam ia kiba shong quarantine ka long T.6.11 klur. Na ka bynta ki Community Quarantine centre ka long T.1.5 klur, na ka bynta ki nongbylla kiba la register ka sorkar kala ai T.3000/- tyngka marwei bad ha sien sa T.2000/- baroh kala kot sha ka T.12.90 klur.Na ka bynta kito kiba duh bylla khlem pat rehister bad ka sorkar la ai T.700 tyngka shitaiew marwei na ka bynta ki 1.8 lak ngut kala kot sha ka T 38.1klur.
Halor ka jingkam jong u MLA ka Mawsynram ba ka sorkar kala pynlut T.8 klur ban thied ia ka dawai synreit , u myntri rangbah u la pynshai ba ka dei T.1 klur bad ka jinglut ha kaba siew ia ka baikit bai bah ia ki ba trei baroh ka long 8 klur. Na ka liang jong u myntri rangbah u la ong ba ka sorkar ka don ia ki jingkhein baroh bad kan ai sha ki paidbah ba kin tip ia ka jingpynlut jong ka sorkar , la ong u myntri rangbah ka jylla hapoh ka iing dorbar mynta ka sngi.
