Shillong, Naiwieng 17: Ha kane ka saw ka sian, namar ka jingwan lyngshop jong ka khlam ka ngoh kaba la saphriang bad lyngshop ym tang ha kane ka Meirilum, Meirisan baieit ka jong ngi, hynrei ha satlak kane ka snieh pyrthei, ka jingrakhe pyndon burom ia ka Seng Kut Snem kaba 121 mynta u snem ha ka 23 tarik Naiwieng 2020.
kane ka jingrakhe mynta u snem kan long kaba rit bad kaban da bud ryngkhing ia ki kyndon bad ka adong- adit ba la pynmih da ka sorkar, khnang ban lah ban teh lakam na kane ka tyllep tyrbun kaba la pur sted katba nang iaid ki sngi.
Kumta, ka Seng Khasi Kmie kan pynlong tang ka jingkyntiew lama ha iing Seng Khasi, Mawkhar ha ka 23 tarik Naiwieng 2020, ha ka por 8:00 baje mynstep ban iadon tang ki nongkit kam kiba ha khmat duh jong ka Seng Khasi Kmie bad lai ngut ki dkhot u Tymmen U San ban pyndep ia ka nguh ka dem, ka duwai ka phirat.
Ka jingialang ha Lympung Shad Weiking, Shillong, ha ka juh hi ka sngi ha ka por 2 baje nohphai sngi, kan long tang ia ki dkhot jong ka Seng Khasi Kmie bad ki nongshah khot sngewbha (invitees) kaban ym palat ia ka Lai Spah ngut kumba la ai jingbit da ka sorkar, katta “ tang ia kito kiba da ioh da ka Invitation Card/ Entry Pass.
La kyrpad ruh ia baroh ki Jylli bad Tnat Seng Khasi ka Bri U Hynñiewtrep ban sngewbha ban rakhe ia ka Seng Kut Snem ha ka 23 tarik u Naiwieng 2020, ha ka por 8 baje mynstep da kaba pynher da ka lama Seng Khasi, ha la ki jong ki-jong skul bad iing Seng Khasi ki jong ki ryngkat ka nguh ka dem, ka duwai ka phirat da u Tymmen U San jong ki jylli/tnat Seng ki jong ki bad ka jingialum kynhun kan nym palat ia ka Sanphew Ngut bad ban da bud ryngkhing ia ki jingbthah bad ki adong-adit jong ka sorkar.
Kino kino ki jylli kitnat Seng Khasi kiba thmu ban rakhe ia ka Seng Kut Snem ba 121 ha ka 23 tarik Naiwieng 2020 da kino kino ki tamasa kin hap ban pan bad ioh jingbit hi shuwa na ki Deputy Commissioner kiba ki Jylli ki Tnat Seng Khasi jong ki ki hap.
Kane ka jingpynbeit ban rakhe Seng Kut Snem kumba la kdew haneng kan long beit thik tang naka bynta mynta u snem namar ka jingan lyngshop ka khlam ka ngoh bad ki jingpyrkhing ba la mana bad ki adong-adit ba la buh da ka sorkar. Ka Seng Khasi Kmie ka ai khublei Seng Kut Snem ba 121 kaba suk kaba kmen bad kaba jop ia phi baroh, la ong u Bah Don Kupar Dkhar President ka seng khasi.
