Shillong, Naiwieng 22: U samla Dusterwell K. Lyngdoh , Organising Secretary KSU South West Khasi Hills District, la ong ba ha ka miet sngi saitjian la kynnoh ba u wei u runar u ba la tip kyrteng ku
m u Peter Snaitang naka Shnong Photjaud Rangthong u la byrngem iaki ar ngut ki samla nongialam ka KSU Photjaud Rangthong Unit kata ia u samla Donaldstone Thongni uba dei u Vice President bad ia u Everwell Robin Thongni uba dei u president ba rim kane ka unit bad uba bat mynta kum u Disciplinary Secretary.
Katkum ka kyrowh kaba la phah da u tei u nongialam jong ka seng KSU ka SWKH District la ong ba kane ka jingjia ka la jia haka por 8 baje janmiet eiei ha kaba une u runar u la pyrta ha surok shnong hajan iing jong u Samla Everwell Robin Thongni hakaba u la byrngem ia une u dkhot ka seng ryngkat ki jingbyrngem byrsit ba un pynjot bad thang iaka ing ka sem jong une u samla lem bad iaki jingdon jingem baroh.
Na ka liang jong ka KSU SWKH District la ong ba, ym tang katta , u tei u briew u la leit ban byrngem lang ruh ia kiba haing hasem jong une u samla kaba mynta ki la don hapdeng ka jingshong syier bad ka jingsheptieng. Hadien kata , une u briew u la leit sa ha ing jong u samla Donaldstone Thongni bad pyrshang ban rung jubor ruh ryngkat bad ki tiar pynmynsaw daka jingthmu ban pynmynsaw ia une u samla nongialam ka seng hynrei donbok ba um shym la don ha ing ha kata ka por.
Haba um shym la lap ia u u la byrngem byrsit sa iaki para kynthei jong u kiba dang rit bad ia kiwei kiwei kiba haing hasem. Kumba long mynta kine ki long iing ki don hapdeng ka jingshong syier namar kim tip kaei ka ban jia iaki bad mar mar kine ki samla ki la leit ban buh daka ejahar ha Mawkyrwat Police Station pyrshah ia une u runar uba la buh iaka jingim jongki bad kiba haing hasem ha ka jingma.
Naka liang jongka KSU South West Khasi Hills District lyngba ka kyrwoh na u samla Dusterwell K. Lyngdoh ( Organising Secretary KSU South West Khasi Hills District) ka pynrem jur ia kane ka kam riewkhlaw jong une u briew bad ki dawa ruh naki bor jongka ain ba kim dei ban lehsting namar lada kin lehsting bad lada jia eiei kaba sniew ki bor pulit hi ki hap ban shim jingkitkhlieh.
Ka seng ka kyntu iaki pulit ba ki dei ban kem mardor namar ka kam byrngem pyniap briew, ka kam ba thmu rung jubor haki ing ki sem bad ka kam ban byrngem ban pynjot iaki mar ki mata bad ki jingdon jingem ka dei ka kam ba ki pulit kim dei ban khein kamkai ne khein dewthala.
Naka liang ka seng ka la dawa ruh ba lada ki pulit kim lah ban leheiei ne kim lah ban iada iaki dkhot jong ka seng bad kiba haing ha sem jongki dkhot jongngi da kaba kem mardor ia kum kine ki riewkhlaw, kum ka seng ngim banse ban hap shim hi iala ka bynta ban ai jingiada iala ki dkhot naki riewrunar kiba ju iai pyndik iaki dkhot naka por sha ka por .
