Shillong, Naiwieng 23: Ka seng khasi mynta ka sngi kala pynlong ia ka jingrakhe ia ka lyngkhuh snem 121 ha madan Weiking,Shillong, hapdeng ka jingdon ka khlam COVID-19, ia ka jingle niam la sdang na seng khasi Mawkhar ha ka por mynstep.
Namar ka jingwan lyngshop jong ka khlam Covid -19 ka jingrakhe ia ka Seng kut Snem ka ba 121 la rakhe tang ha ka jingdon ki 300 ngut ki briew kat kum ka kyndon ki ba la buh da ka tnad ka koit ka khiah jong ka sorkar jylla.
Dei ha kum kane ka sngi 23 tarik u Naiwieng 1899 ki khathynriew ngut ki Kynrem ki lyngdan ki khraw pyrkhat khraw jutang ki khyndai bah ryngtieh hapoh ka jingialam jong u rangbah Rajmon Roy Nongrum kum u shongknor bad u President ba nyngkong eh jong ka seng khasi bad kumjuh bad u Rangbah Chandranard Dkhar u Secretary ki ba la pynlong doh long snam ia ka Seng Khasi.
Ka jingseng jong ki 16 ngut ki rangbah jong ka Seng Khasi ka long hadien ba ki la ioh i jngai ia ka jingwan lynshop jong ki bor na Ri sepngi ban pynduh pyndam ia ka Riti Dustur jong u Khasi bad ban teh lakam ia ka jingwan lyngshop jong ki bor na ri sepngi ki la seng ia ka Seng Khasi .
Ka jingrakhe ia ka Seng Kut Snem ka long ruh kum ka dak ban ai burom ia ki 16 ngut ki rangkynsai ki rangdajied ki ba la long ki nongbtin lynti ki nonglam lynti ki ba long ki mawkhrum ki ba long ki nongpynwan dur ia ka Seng khasi kum ba ka long mynta.
Ia ka jingduwai ha madan Weiking la pyndep da ka kynhun ki tynmen ki san jong ki riew rangbah ka seng khasi, ha kane ka sngi la ioh ia ki jingkren na ki riew rangbah ka seng bad kiba la ia don lang ha kane ka sngi ki long u Syiem ka Hima Mylliem u Paiem Ainam Manik Syiem, u MLA ka Shillong West u bah M Rapsang bad kiwei kiwei ki riew rangbah ka seng.
