Jowai: U President jong ka seng Khasi Jaintia National Union (KJNU) sengkmie, haka kyrwoh u bah Ni
man Shadap, u la ong ba ka seng hadien baka ka ladep pyrkhat sani bad bishar bniah bha kala shim iaka rai ban ai ka jingkyrshah ba pura ia ka Confedertation of Meghalaya Social Organisation (CoMSO) bad kiwei de ki seng kiba don bynta ia jingdawa ban pyntrei kam ne ban pynioh noh ia ka Inner Line Permit (ILP) hapoh ka jylla.
U bah Shadap u la ong ba ka seng ka la ai jingkyrshah bad jingiaroh iaka CoMSO kaba lamkhmat da u bah Robertjune Kharjarin President HYC uba long u Chairman ka Organisation, ban dawa ban pyntreikam noh ia ka ILP hapoh ka jylla.
Na ka liang ka seng ka aikhublei bad iaroh ruh ia baroh ki 60 ngut ki MLA jong ka jylla Meghalaya ba ki la pdiang bad mynjur ia ka ILP hapoh ka iing Dorbar Thaw ain jong ka jylla. Kumta na ka liang u Prsident ka KJNU u kyntu ia kitei ki 60 ngut ki MLA ba kumba ki la dep pdiang hapoh ka iing dorbar ban pyntrei kam ia ka ILP.
Ki MLA ki dei ban buddien ia ia kane ka kam, khnang ban pyntrei kam ne pynioh noh ia ka ILP, kumba phi la shah jied ne shah pynkup bor ban long ki nongialam bad ki nongshna ain jong ka jylla.
Ka seng ka ai khublei ruh ia ka sorkar MDA hapoh ka jingialam u Conrad K Samgma, uba leit shi leit sha nongbah Delhi ban iakren ia ka ILP, ka seng ka ngeit skhem ba ka jingleit Delhi jong u myntri rangbah kan long kaba seisoh bad urlong ia ka jingthrang jong ki sengbhalang bad ka jylla hi baroh kawei.
Na ka liang ka seng sa shisien ka khot bad wer ia baroh naduh ki sengtrei mon sngewbha, ki samla, ki longkmie longkpa bad kiwei bad kin dei ban don ka jingsngew iapher hynrei dei ban don ka mynsiem iatylli naka bynta ka daw bah daw san jong ka jait bynriew kat bym pat sep ka sngi, namar lada ngim ia tylli ngi sa shah iuhroit ha ki poi ei bad ngi sa long mraw ha kawei ka sngi.
