ka sorkar jylla ban wanrah lang ia ka 39th National Games ha ri lum Jaintia: JSU

Shillong, Naiwieng 25: Ka seng JSU seng kmie hadien ba ka lah shong ia ka jingialang EC meeting ka lah iakren halor ar tylli ki mat, kaba hakhmat eh kadei ka mat ILP bad ban pyrshah ia ka CAA bad kaba mat kaba ar kaba seng ka buh ha khmat ka dei ban pynsngew bad dawa na ka sorkar jylla ban wanrah lang ia ka 39th National Games ha ri lum Jaintia.

Ka seng da kawei ka rai ba mih na ka jingialang kadei ban dawa na sorkar jylla ban shimkhia ban ia kren noh mardor bad ka sorkar pdeng ban dawa ban pynlong aiñ noh mardor ia ka ILP hapoh ka jylla namar lah jan shi snem hadien ka jingiarai lang ki MLA hapoh ing dorbar thaw aiñ ban pdiang ia ka ILP.

Halor kane ka rai ka sorkar pdeng haduh mynta kam pat sngap satia ia ka resolution jong ki MLA ka jylla hapoh ka ing Dorbar thaw aiñ.Kumta na ka liang ka seng ka kyntu jur ia ka sorkar jylla hapoh ka jingialam u CM u Conrad Sangma ban ia kren biang bad ka sorkar pdeng ban sngap ia ka jingkwah ki paidbah ban pynioh ia ka ILP hapoh ka jylla.

Ka seng JSU sengkmie ka kyrpad sha baroh ki paid ka bri u hynniewtrep bad sha baroh ki paralok sengbhalang bad sha ki political party ban ia tylli lang kawei ban dawa na ka sorkar jylla ba kan shim khia ban ia kren noh mardor bad ka sorkar pdeng ban pynurlong ia ka ILP kaba u paid ka bri u hynniewtrep ki lah ang nud lah slem.

Ka seng lyngba u President samla Jersom Shylla ka kren shai ba kan ia treilang bad kino kino ki sengbhalang kiba wan shakmat ban dawa ia ka ILP bad ka seng ka long kaba lah khreh ban mih shakhmat na bynta ka daw bah ka jaidbynriew bad ka seng ka dawa na ka sorkar pdeng ban pyllait ia ka jylla baroh kawei na ka aiñ CAA namar katba long mynta ka CAA ka dang ktah ia ka jylla namar kidon ki jaka ki bym hap ha ka schedule area.

Ka seng lyngba u General Secretary u samla Treiborlang R Suchen u lah ong ba ka seng JSU kabuh ia ka mat National Games ha khmat eh namar ia kaba long mynta ka ri lum Jaintia ka sorkar jylla kam shym lah phai khmat sha ka ka thaiñ Jaintia bad kane ka ktah bha ia ki samla ka thaiñ namar bun na ki samla bad ki nongshong shnong ka thaiñ ki ang nud ban wan rah ia ka National Games.

U samla Treiborlang R Suchen u lah ong kum ka seng ka kyntu ia ki nongmihkhmat ka thaiñ Jaintia ban pynsngew sha ka sorkar ban wan rah ia ka National Games hapoh ri lum Jaintia bad ki nongialam ka seng kin sa leit ban kynduh ia u CM ban pynsngew bad dawa ban wanrah ia ka National Games ha ri lum Jaintia. Ka kyrwoh ba phah da u Publicity Secreatary ka seng kmie u samla Dapmaiñ Suchiang.