Shillong, Naiwieng 25: U National Vice President jong ka BJP u Dr M. Chuba Ao u la ong ba tang hapoh ki iing ki sem bun ki khun ki don la ka jong ka jong ka jinglong, kane ka jia kum juh ha ka porty BJP balei ban shu pynsngap ia kito.
Haba ia dei bad ki jingkynnoh bamsap na ka liang jong u Dr Ao u la ong ba ka BJP ka don kawei pat ka kyrdan kaba kin sa leh ia mynta u la ong ba um pat kwah ban ong ei ei halor kane ka jingkynnoh namar ban phah tohkit ha ka CBI don kam ia ki sakhi satar kiba biang bad ia kane un sa ia kren ba u President ka BJP Meghalaya halor kane.
Haba ia dei bad ka jingdon ha ka sorkar MDA la ong ba lada kim hum kin mih noh bad ha ka juh ka por la ong ba lada ka NPP kam hun ka lah ban mih noh, hynrei ka jingwan jong u ka long ban ia pynbeit, ka BJP kam shym shah kyntait ha kane ka sorkar MDA namar u wei u long myntri bad u wei pat u ioh kam Chairman.
Haba ia dei bad ka jingtrei kam jong ka sorkar MDA u nongialam ka BJP u la ong ba ki paidbah kin sa ai ia ka jubab, kumba ka long mynta ka jingiatrei kam ka don ka jingiasngewthuh jingmut bad ha ba ia dei bad ka jingkyrshan la ong ba kim dei ban ki shu kyrshan matlah.
Na ka liang jong u Dr Ao u la kren shai ba ka jingwan jong u ka long ban pynkhlain ia ka party ban pynkhreh ia ka ilekshon MLA ka ban long ha u snem 2023 bad ha kane ka jingwan u la ia kynduh ia ki nongkit kam jong ka party bad la ia kren kum no ban pynkhlain ia ka party.
