Shillong, Nohprah 07: Namar ka jingduna palat ki “Doctor Specialist” ha ka jylla Meghalaya ka cabinet ha ka jingialang kaba la long mynta ka sngi kala shim ia ka rai ban buh noh ia ka jaka ai jinghikai ia ki doctor MBBS ban kin ioh ia ka kyrdan “Specialist”.
U Symbut Myntri Rangbah ka jylla u bah Prestone Tynsong u la ong ba, ka jingshim ia kane ka rai ka long ban pymih kham bun ki Dr Specialist, la ong ba kumba ka long mynta ka jingduna kum kine ki Doktor ka long ha duh 120 ngut ha ka jylla baroh kawei.
La iathuh shuh shuh ban buh ia kane ka jaka ai jinghikai kan long kumba T.2 klur tyngka ei ei bad ka jinglut na ka bynta ban pyniaid ia kane ka jingai jinghikai kan long hapdeng T.55 haduh T.60 lak tyngka ha ka shisnem. Ia ki nonghikai ka sorkar kan wan rah ia ki briew kiba na sha bar.
Ha kane ka jingialang jong ka cabinet kala pdiang ruh ia ka Meghalaya Nursing Rule 2020, la ong ba ka sorkar kala dep ban pdiang ia ka ain Meghalaya Nursing Council Act ha u snem 1992 bad ia ka rule pat dang lah ban pdiang mynta ka sngi.
