Shillong, Rymphang 01: U Myntri Rangbah jong ka jylla u Conrad K Sangma mynta ka sngi u la plie ia ki ar tylli ki iing skul, kawei ka Garobadha Secondary School bad kawei ka Rangsakuna Higher Secondary School, jong ka South West Garo Hills District.
Na ka bynta ka Rangsakona la bei pisa T.1.85 klur tyngka bad na ka bynta ka Garobadha pat la beit pisa T.3.09 klur tyngka. Ia kane ka pisa ban tei ia kitei ki ar tylli ki iing skul la bei lyngba ka Asian Development Bank.
Haba kren ha ka jingplie ia kine ki ar tylli ki iing skul u myntri rangbah ka jylla u la ai khublei ia ka ADB kaba la bei pisa na ka bynta ban shna ia kine ki iing skul, la ong ba khlem ka jingmang jingstad kan nym don kawei ruh ka jylla kaban kiew dei na kane ka daw ba ka sorkar kala buh ia ka tnad pule puthi ha khmat eh.
U Myntri rangbah u la ong ruh ba ha kane ka snem mang tyngka ban wan ka sorkar kan mang pisa ban maramot ia ki 200 tylli ki iing skul ha ki Lower Primary bad ha kine ki lai snem ban wan kin ialeh ban maramot 800 tylli ki iing skul ha ka jylla baroh kawei, na ka liang jong u myntri rangbah u la pynpaw ia ka jingsngewdiaw ban iohi ba ki iing skul ha ka jylla ki jot rathai.
Ha ka jingkren jong u myntri ka tnad pule puthi u bah Lahkmen Rymbui u la ong ba ha South West Garo Hills ki khynnah na ka 100 ngut 74 ngut ki phail ha ka matrik, na ka liang jong ka sorkar kala thaw ia ka kommittee ban wat ia ka daw jong ka jingphail ki khynnah.
Ha kane ka sngi u Zenith M Sangma MLA ka Rangsakona u la ai khublei ia u myntri rangbah ka jylla u Conrad K Sangma ba la wan hi da lade ban plie ia kine ki ar tylli ki iing skul hapoh ka konstitwensi ka jong u, ha kane ka sngi ki khynnah skul kila pynphuh da ki jingshad jong ki.
