Shillong, Rymphang 05: Ka Seinraij Shangpung ka la ioh ban rakhe iaka lyngkhuh sngi iap ba 159 snem jong u Kiri Daloi Dhar ha Lummukut, Shangpung.
Hakane ka sngi la iadonlang ruh u Daloi ka Shangpung Elaka, u MDC ka thaiñ u ma J. Treilang Suchiang, Ki Nongialam ka Seinraij Shangpung, Ki Dkhot ka Khasi Students Union Shangpung Unit bad kiwei kiwei ki riewpawkhmat ka thaiñ.
La ioh ruh iaka jingkren na u Daloi ka Shangpung Elaka u Ma Chanki Langbang, U Samla Phrang Papang President ka KSU Shangpung Unit, Ki nongialam ka Seinraij Shangpung bad kiwei pat iakiba la pyrto iaki kam ba bha bad ba shlur u Khlawait Kiri Daloi Dhar uba la shah pyniap haki shipai phareng ha ka 5 tarik u Rymphang, 1862.
Ladon ruh ka jingiamareh marathon haka por mynstep naduh na Ialip haduh Lummukut ka jaka kaba don u Mot Tei Sahnam jong u Woh Kiri Daloi Dhar kum ka dak ka jingrakhe sah kynmaw ia utei u khlawait ka thaiñ.
Iakane ka jingiamareh marathon la iashom bynta da ki khynnah, ki samla bad ki rangbah ka shnong.
Ladon ruh ka jingbuh syntiew ia u tei u khlawait da ki rangbah ka Seinraij Shangpung, U Daloi, u Acting Daloi, U Waheh Shnong Ka Shnong Shangpung Pohshnong U Ma Richardson Rabon , ka KSU Shangpung Unit bad kiwei ki Sengbhalang.
La pynphuh pynphieng iakane ka program da ka jingshad tynrai naki samla ka shnong bad ka jingshad pastieh naki rangbah Khadar Nor.
Hakane ka sngi naka liang ka KSU Shangpung Unit ka la nohsyniang ruh daki tin bret niut ( Dustbin) sha ka Seiñraij Shangpung naka bynta ban pyllang niut.
