Shillong, Lber 11: U Myntri ba dei peit ia ki kam bor ding u James K Sangma haba jubab ia ka jingiakren kaba la wan rah da ka Dr Amapreen Lyngdoh ha kaba ia dei bad ka jingeh ha kaba ia dei bad ka bor ding eletrik ha ka jylla, la ong ba ka “Smart Meter” ki shong dor T.3400/- tyngka kawei.
U Myntri u la ong ba ka jingpyndon kam ia ki Smart Meter ka long ban ioh ia ka jingkhein kaba janai ha kaba pyndon kam ia ka light khamtam sha ki nongkyndong bad kane kan iarap ia ki ba pyndon kam ia ka bor ding eletrik bad ha ka juh ka por ka ka MeECL.
Haba ia dei bad ka jinglum ia ka bai ding eleltrik, la ong ba mynshuwa ka long tang 62% bad mynta la kham pynbha shuh shuh bad ka jinglum ia ka bai ding elektrik kala siew sha ka 73% bad na ka liang MeECL ka ialeh ban weng ia ka jingtuh light kaba da kaba shu bnoh khamtam ha ki nongkyndong.
Halor ka jingkynnoh ba ka don kata ka jingpynlip light u myntri u la ong ba ka jingpynlip light ka long kham palat mynshuwa lada shim naduh u snem 2010 ter ter haduh 2018, ha u snem 2020 kam shym don kata ka jingpynlip light bad dei tang ha kine ki khyndiat sngi ka don ka jingpynlip light dei na ka NTPC.
Ka jingeh kaba ka MeECL ka ia kynduh ka long ba ka sorkar ha kato ka pork am shym la leh ia kaei kaba kala kular dei na kane ka daw ba ka MeECL kala hap ban siew na pla sha ki nongtrei kaba la kot sha ka T.844 klur tyngka.
Haba ia dei bad ka jingong ban ailat biang ia ka “One Time Settlement” na ka liang jong ka sorkar ha kaba ia dei bad kane kan sa pyrkhat kumba la kren da ka Dr Amapreen Lyngdoh kaba wanrah ia kane ka mat ia kren.
Haba jubab ia ka jingkren jong u nongialam ka liang Pyrshah u Dr Mukul Sangma u Myntri ba dei pait ia ka kam bor ding u la ong ba ka sorkar kam shym la buhrieh ia ki jingshisha kumba la kynnoh ban shu kynnoh kam long kaba bha, la ong u James.
Halor ka jingiasoi ia ka soskular bad ka NTPC ha u snem 2007, u myntri kam bor ding u la ong ba dei ban sngewthuh ba ka Ri India ka dei ka Ri kaba don ia ka rukom pyniaid sorkar kaba la tip kum ka “Federal Structure” kaba mut ba ka sorkar jylla ruh ka don ia ka bor ban ong em ia kaba ktah ia u paidbah ka jylla.
Katkum ka jingiasoi ia ka soskular bad ka NTPC ka long ba kan trei kam naduh u snme 2019 bad kane ka jingiathuh kular kan kut ha u snem 2044, haba ia dei bad ka bai light ynda la dep ia ka Ganol Hydro Power Project kan long T.4.54 tyngka shi Unit.
Halor ka jingpyndam noh ka sorkar ia ki jingiasoi soskular ha u snem 2007 bad 2008, u myntri kam bir ding u la ong ba ka jingpyndam ia kitei ki soskular ka long ba kim shym la trei kam bad kine kila khanglad ia ka jylla ban sdang tei ia ki jaka pynmih bor ding ha ka jylla.
