Shillong, Lber 15: U Symbut Myntri Rangbah ka jylla u bah Prestone Tynsong ba dei peit ia ka tnad shna surok haba jubab ia ka jingkylli u bah Syntar Klas Sunn MLA ha kaba ia dei bad ka surok Mawphlang Balat, u Symbut myntri u la ong ba ka sorkar kala dep ban phah ia ka skhim sha ka tnad shna surok jong ka sorkar pdeng bad mynta dang ap ban ioh ia ka jingmynjur kas orkar pdeng.
Haba jubab ia ka jingkylli bynrap, u Symbut Myntri Rangbah ka jylla u bah Prestone u la ong ba ka dei ka jingshisha ba ha u snem 2020 la pynsangeh noh ia ka jingpynkhreh ban jurip ha kaba ia dei bad ka jinglut ban shna ia kane ka surok, ka daw ka long ba kala dan ka jingiakren ban pynkylla noh ia kane ka surok na Mawphlang-Balat- Ranikor sha ka National Highway.
Ha kane ka jingiakren hapdeng ka sorkar jylla bad ka sorkar pdeng kala don ka jingkular ban pdiang ia kane ka jingpan jong ka sorkar jylla ban pynlong noh kum ka National Highway ia kane ka surok na Mawphlang sha Mawsynram sha Balat shaduh Ranikor.
Ka sorkar pdeng kala thoh ban phah pynsangeh shuwa shipor ban pynkhreh ia ka jinglut ha kaba ia dei bad kane ka surok namar bay m pat shim ia ka rai, kane ka surok ka long kaba don kam namar ka jingbun ki kali kiba iaid bad khamtam ia ka ioh ka kot jong ki briew katei ka thain. Kane ka surok ka ktah ia ki saw tylli ki MLA Konstitwensi.
